KDU-dä Poloniya elçiliin yardımınnan yapılmış pınarı hem dinnenmäk erini şannı açtılar
Canavar ayın 25-dä ofiţial vizitinnän Gagauziyaya geldi Poloniya Büük elçisi Moldovada Tomaş Kobzdey. O buluştu avtonomiyanın Başkanınnan . Vizitin taa büük payı geçti Komrat Devlet universitetindä.
Geldiynän Gagauziyaya Poloniya Büük elçisi Tomaş Kobzdey ilktän buluştu avtonomiyanın başınnan. Onnar buluştular başkanın kabinetında, sora birerdä gittilär pınarın açılışına Komrat Devlet Universitetinä. Polonoyanın finans yardımınnan bu üürenmäk kurumunda peydalandı pınar kaliteli suylan hem dinnenmäk zonası parasız internetlan.
“Burada pınarın derinnii 20 metra, pak hem kaliteli su, burada var kolaylık gençlerä deyni dinnenmää. Biz tertipledik dolayını, geçirdik şafk. Biz umutlanȇrız, ani bu yer olacek o er, neredä var nicä lafetmää, diişmää bakışlarlan. Bän umutlanȇrım, ani bu proekt olacek ii, hem ilerleecek”,- söledi universitedin rektoru Sergey Zahariya.
Proektin bütündän paası 248 bin ley, angılarından 12 bin evro, angısını verdi poloniyanın hükümeti. Taa 30 bin ley koydu kendi büdjetından universitet. Başkan şüküretti Poloniyanın büük elçiliini, ani verdi kolaylık bölä proektleri yapmaa avtonomiyada.
“Bän umutlanȇrım, ani bu proekt olmayacek bitki, ani olacek çok başka proekt, angıları yardım edeceklär bizim genç olannara, yaşayan Gagauziyada, üürenän üüsek kurumnarda, koladjlara, okullarda duymaa kendilerini komfort, olsun kaliteli koşulları, angıları var devletin uşaklarında. Bizä deyni pek önemli, ki bizim uşaklar gitmesinnär bireri. Da sizin investiţıyaları bu uurda pek lääzımnı bizä”, — söledi başkan.
Poloniyanın Büük Elçisi Tomaş Kobzdey şükür etti teklif için Gagauziyaya hem sıcak karşılamak için. O nicä da regionun kuvetleri sayȇr, ani investiţiyalar üürenmäk uuruna pek önemli faktor genlerin ilerlemesindä.
“Poloniyanın yardımcı programmasında var maasus logika. Bän düşünerim, ani investiţiyalar bilgi uuruna, gençlerä vererlär büük perspektvaları gelecää. Taa bir keret şükür ederim kolaylık için sizinnän buluşmaa”, — söledi elçi.
İleri dooru sfinţit ettilär pınarı, oluşta bulundular studentlar, üüredicilär, hem univesitetin zaametçileri.
“Bän hepsini şükür ederim bölä faydalı iş için. Su – bu dünnedä pek paalı bişey. İnsannara o her keret lääzım. Biz bunu tutturȇrız. Komartta çok insan, angılalrı kullanȇrlar pınarları. Bu lääzım”, — söledi Komrat Prorok İlya adına klisenin popazı protoiyerey Födor.
Oluşun sonunda rektor barabar üüretim bakanınnan gösterdilär Polonia elçisinä Tekwill merkezini, angısı çalışȇr universitettä. Başarıldı büük elçinin viziti açık lekţıyaylan studentlerä deyni englizca.
Reportörlar: Mariya Statova, Zinaida Kanţır
Video: Väçeslav Kıssa
Montaj: Artöm Topal
Источник grt.md
