KDU-dä abiturientlara deyni yaptılar kvest oyununu
Her yıl Komrat Devlet Universitetindä geçirlener büük iş, ki merakladırmaa okul başarannarını onnar zanaatı kabletsinnär Gagauziyada. Türlü oluşlar vererlär kolaylık gençledä taa islää universitlan tanışmaa. Çiçek ayın 15-dä ölä bir oluş geçirdi Ekonomika fakulteti.
Komrat Devlet universiteti çoktan gösterdi kendisini nicä kaavi üüsek üüretim kurumu Moldovanın üülen tarafında, nışannadı rektor Sergey Zahariyä. Başarannarın taa çoyu bilmeer Ekonomika fakultetin herbir zanaatı için. Bildirtmää liţeycileri taa derindän universitet için yardım etti kvest oyunu.
«Bölä oluş verecek kolaylık taa derindän bizim universitetimizlän tanışmaa. Görmää üüredicilerin üüsek uurda bilgilerini hem becermeklerini», — nışannadı Sergey Zahariya.
Oyunda para hem buhgalter saymakları temaya görä pay aldılar diil sade studentlär, ama liţeylerin başarannarı da. Oyun studentlerin bilgilerini kaavileştirer, liţeycileri dä merakladırȇr. Onun pay alannarı lääzımdı kasaba içindä saklanmış bilmeyceleri çözsünnär.
«Biz istedik göstermää, ani KDU Ekonomika fakultetindä üürenmäk diil sade klaslarda yada online geçer, ama te bölä meraklı da. Var kolaylık kendi bilgilerini kullanmaa hem kaaviletmää te bölä bilgi oyunnarında. Studentlik vakıdı türlü taraflı. Biz herbir tarafı isteeriz göstermää», — açıkladı Ekonomika fakultetin başı Lüdmila Todoriç.
Oyunda 3 takım pay aldı.
G.Gaydarcı adına liţeyin başaranı Daniil Kalpakçı ansızdan pay aldı oynuda. Genç olan şansora biler, angı zanaatı ayıracek hem neredä üürenecek. Bu kvest taa bir sıra ona bildirtti, ani dooru karar aldı, nışannȇȇr çocuk.
«Komrat Devlet universiteti en ii er ,neredä üüsek uurda bilgilär veriler. Ayıracam Ekonomika fakultetini”, — söledi Daniil Kalpakçı.
Ekonomika fakultetin ikinci kursun studenti Kirill Bargan sayȇr, ani bu oyun online üürenmektän sora, nicä taazä soluk. O diil oyun maanalı, ama üüredän dä. Kirill söledi,ani bitirdiynän universiteti kalacȇk işlemää Gagauziyada.
«Burada benim ayläm,dostlarım, yaşamam. Düşünmedän KDU ayırdım. Başardıynan kalacam Gagauziyada işlemää», — söledi o.
Kvest oynunun pay alannarı diplomnarı, kubokları hem para baaşışlarını kablettilär.
Источник grt.md
