KANON HEM KARAR KABLEDİLDİLÄR İKİ OKUMAKTA
GHT baktılar kanonu, angısı baalı “Gagauziyada Enseyış simvolların kullanmasınınnan”. Bundan kaarä bakıldı karar da, angısı baaşı “Georgiev şiridi” akţiyasının geçirilmesininnän Avtonomiyada.
GHT deputatı oturuşta Sergey Çimpoeş nışannadı, ani istoriya olaylarını lääzım bilmää.
SERGEY ÇİMPOEŞ GHT deputatı:
“Bu iş ne satın alınȇr, ne dä satılȇr. Önemli, ani insan bilsin, aklısında tutsun. Pek islää, ani bu soruş bizi birleştirdiı”.
GHT deputatı Nikolay Dudoglo nışannadı, ani Gagauziya Moldovanın içindeliinä girer hem HT lääzım her aman esaba alsın o olayları, angıları devlet uurunda olȇrlar.
NİKOLAY DUDOGLO GHT deputatı:
“Bän verecäm kendi sesimi bu kanon için hem sayȇrım, ani bu kanon devlet kuvetlerinä deyni bir nışan gibi lääzım olsun. Onnar lääzım alsınnar esba onu, ani Halk topluşunun var hakı Moldovanın Parlamentinä iniţiativalarlan çıkmaa”.
GHT başın yardımcısı Georgiy Leyçu nışannadı, ani bu kanonun kuvedi bütündän işleyecek.
GEORGİY LEYÇU GHT başın yardımcısı:
“Bu kanonu kabletmää HT var hakı-bunda şüpä yok. Biz lääzım bunu yapalım hem o, başka kanonnar gibi, lääzım işlesin”.
Bundan kaarä deputatlar baktılar kanonu, angısı baalı “Georgiev şiridi” akţiyasının geçirilmesininnän Avtonomiyada.
İVAN DİMİTROGLO GHT deputatı:
“Teklif edildi geçirmää türlü olayları ki anmaa enseyiş gününü. Burayı girer okullarda toplantıların geçirilmesi hem hederlez ayın 9-da toplantıları geçirmäk”.
Deputatlar kablettilär diişilmekleri, angılarına görä kanonda “Georgiev şiridi” adlanacek nicä “Gvardeysk şiridi”.
MİHAİL JELEZOGLO GHT deputatı:
“Georgiev şiridi kabledildi 1700 yılda, onun yok ilgisi 1945-ci yılın enseyişinnän, çünkü o kullanılardı nicä Gvardeysk şiridi. Bişey olmayacek, eer biz bunu yaparsaydık. Bu bir saygı bizim istoriyamıza”.
“Georgievsk şiridi” 1769-cu yılda Russiya İmperiyasının imperatriţasınınnan Ekaterinaylan kabledildi hem kullanılardı ofiţerlerinın ödülleri payı gibi. 2005-ci yıldan beeri “Georgievsk şiridi” kullanılȇr hederlez ayın 9-da enseiş simvolu gibi. Kanon hem karar iki okumakta bakıldılar hem kabledildilär hem başkana imza için verildilär. Önemli urgulamaa, ani diil çoktan MD Parlamenti seçti karar cezalamaa insannarı “georgiev şiridini”, “V” hem “Z” simvollarını kullanması için. Bu iş için yaşayannar var nicä kabletsinnär dürt buçuk bindän dokuz bin leyädän ceza. Bu kanon MD prezidendinnän çiçek ayın 19-da imzalandı.
Источник grt.md
