«Kadınca» ansamblisinin 30 yıldönümünü Komratta büük yortulu konţertlan kutladılar
Canavar ayın 30 –zu Gagaguziyaya deyni önemli gün. Bu gün bütün dünneyä anılmış «Kadınca» oyun hem türkü ansamblisi kuruldu. Bu yıl o 30 yılını tamannȇȇr. Yıldönümünnän baalı yortulu konţert Komradın Kultura evindä geçti. Yortunun programasında avtonomiyada yaşayan — gagauzların, moldvannarın hem bulgarların türküleri hem oyunnarı vardı. Yortunun saygılı musaafirleri oldular “Moldova Concert” kurumun başı Andrey Lokoman, Gagauziya Halk Topluşun hem Parlamentin deputatları, avonomiyanın primarları.
Anılmış «Kadınca» oyun hem türkü ansamblisi bu yıl 30-cu yıldönümünü nışannȇȇr. Bu beterä artistlär devlet uurunda Kultura ministerliindän hem “Moldova Concert” kurumundan ödülleri kablettilär.
«30 yıl — önemli yaş ansambilin ecelindä. Nezaman yakışȇr geeri baktıynnan çıkışlar artık belli. Yaş, nezaman var nicä ileri bakmaa mutluluklan hem umutlan geleceyä. Moldova Devletin prezidenti geldi karara “Moldovanın şannı kultura izmetçisi” adını vermää bir kaç artistä: Pötr Kazancıya, Elena Deçevaya, ansamblinin öndercisinä Mariya Taranenkoya hem Vasiliy Telpiza verildi», — haberledi “Moldova Concert” kurumun başı Andrey Lokoman.
Prezidentin adından «Kadınca» ansamblisi 200 bin ley eni ruba almaa deyni kabletti. Gagauziyanın kultura bakannıı barabar başkannan İrina Vlahlan oyunculara eni ayakkabuları baaşladılar.
«30 yıl az o sa çok mu diil belli. Ama bu vakıtta bu artistlär türlü sţenalarda gösterdilr kendi becermeklerini hem ustacılıını. Sizä şükür deeriz,ki kulturamızı bildirersiniz, oyunnarımızı hem türkülerimizi koruyȇrsınız», — söledi Gagauziya kultura bakanı Marina Semönova.
«30 yıl ansambliyä deyni diil çok, ama onun istoriyası artık var. Neredä belli çeketmesi, başarılar. Dilerim, ki «Kadınca» bakmayarak kimseyä sade ileri gitsin. Ko kimsey onnara engel olmasın», — söledi GHT deputatı Vladimir Kıssa.
Kultura evin zalası doluydu. Yortunun musaafirlerinä deyni Gagauziyanın hem Moldovanın türlü milletlerin kulturalarını gösterdilär «Kadınca» ansamblisi, Kişinövdan «Flueraş» türkü hem oyun ansamblisi, bulgar «Rodolübie» ansamblisi Tarakliyadan hem en anılmış grupaların biri «Noroc».
«Duyguları laflarlan yok nicä annatmaa. Büün göründü, ani biz haliz Gagauziyada. Bileriz hem emin olduk, ani «Kadınca» bizim vizit kartımız», — söledi Moldova Parlament deputatı İvanna Köksal.
«Açan zala girdik, şaşarak kaldık. Gözlerimiz yaşlan doldu o şafklardan, angılarını bizä deyni hazırladılar. Yoktur bizim için bölä yortu geçirdiydilär. Hepsini taa bir sıra kutlȇȇrım yortuylan», — söledi «Kadınca» ansamblisinin başı Mariya Kıssa – Taranenko.
1992-ci yılda Gagauziyada «Kadınca» oyun hem türkü ansamblisi kuruldu. Avtonomiyanın vizit kartı herzaman siiredicileri kendi yaratmalarınnan şaştırardılar. O oyunnarı anılmış horeograf Avram Kösä koymuştu. O terbiedärdi gençlerdä halk oyunnarına sevgiyi, adetlerä, hem gagauz kulturasına saygı, nışannadı Moldova Parlamentin deputatı İvanna Köksal.
Eni buluşmalar, konţertlär hem yortular. Eniletmää repertuarı, ilerletmää kaviletmää kendi becermeklerini — te bu daavaları kendi önünä «Kadınca» koyȇr. Siiredicilerä sä sade kalȇr desteklemää kendi sevgili artistleri.
«Okadar beendiim konţerdi! Canım mutlu kaldı hem sevineräk evä giderim. Şükür, ani bän Gagauziyada yaşȇȇrım. Ansamblidä haliz professional artistlär çalışȇrlar. Hodulluyum, ani Gagauziyada yaşȇȇrım. Pek severim onnarı».
«Pek islä konţert geçti. Hepsi koliktivlär hem bizim «Kadınca» üüsek uurda sţenaya çıktılar. Kablettim ii duyguları. Saa olsunnar, ani bizä bölä konţert hazırladılar. Kadınca ilerlesin bakmayarak hepsi zorluklara».
«Orada benim uşaklarım büün oynadılar. Dilerim onnara iilik hem ilerlemäk. Ama en paalıı o saalık, açan o var, hepsi olȇr».
«Kadınca» ansamblisi 30 yılın içindä pay aldı dolay, bölgä, devlet hem halklararası festivallerdä Rumıniyada, Bulgariyada, Greţıyada, Franţıyada, Türkiyada, Ukrayınada, Rusiyada hem Belarusiyada.
Reportör: М. Тоpal
Video: G. Stavilov
Kurgu: А. Тopal
Источник grt.md
