İlkyaz – suuklamak hastalıkların zamanı. Doktorun nasaatları, nicä korunmaa
Bakmayarak ona, ani ilkyazın olȇr taa sıcak, hep okadar bu vakıtta insan en sık sıra hastalanȇr suuklamak dertlerinnän.Nasıl koorunmaa, üürendi Zinaida Efremova.
Hava diişincä ilkyazın insan başlȇr suuklamaa. Üsürmek, buvaz acıması, ansırmak – hepsi bunnar suuklamakların nışannarı. Kıştan sora, açan güüdä yufkalandı, kolay kapmaa bu hastalıkları. Ama koorunmaa onnardan deyni, lääzım birkaç önemli kural tutmaa, nışannadı aylä doktoru Viktor Nägu.
“Pek kalın hem pek incä olmaz giinmää, ki, ne terlemää, ne da üşümää. Yayan gezmää da lääzım taa çok — bu faydalı saalık için, kan taa islää örüyer, da immunitet güçlener”, — söledi doktor.
Lääzım sık imää meyva hem zarzavat, suan hem sarmısak. Taa az tatlı imekleri imää, urguladı doktor.
“Açan biz iyeriz çok tatlı: bomboni, şokolat,tort, çay, ozman leykoţitlar – kanın biyaz kletkaları insanın kanında biter kuvetleri kendi işini yapmaa”, — açıkladı Viktor Nägu.
Taa sık sıra dışarda gezinmää lääzım, fizkultura yapmaa, verdi nasaat doktor. Önemli taa içmaa çok su.
“Sabaalen kalktıynan lääzım içmää su, paklamaa katıyı hem barsakları hem sulandırmaa kanı – bundan imunitet kalkȇr”, — söledi doktor.
Hastalandıynan gripplan yada respirator infekţiyasını kaptıynan lääzım vakıdı kaybetmedään doktora daanışmaa, deyni maasuz ilaçlanmayı kabletmää. Ama antibiotik ilaçlarını da pek çok olmaz kullanmaa, nışannadı Viktor Nägu.
“İnsanda çoyunda var tabeet: biraz üsürdü, biraz ansırdı – tez antibiotik içerlär. Bu diil dooru. Esap aldım, ani kim te o analar,angıları taa az bu ilaçlardan uşaklara verdilär, onnar taa az suuklȇrlar. Bir taraftan yardım eder bu ilaçlar, öbür taraftan da adamı öldürer. Sade doktor var nicä yazsın bölä işleri, kednibaşına olmaz içmää”, — urguladı aylä doktoru Viktor Nägu.
Doktor taa nasaat verdi stresstan sakınmaa, çünkü o insanın bütün saalıını yufkaladȇr.
Hepsi kurallardan kaarä, aktual kalȇr gigienanın tutması, angısı yardım eder koorunmaa türlü viruslardan hem koorumaa saalıı.
Источник grt.md
