İlktän öldürdtülär, sora da orden verdilär: Georgiy SIRTMAÇın kahramannıın 30-cu yıldönümünä
30 yıl geeri, 1992-ci yılın Hederlez ayın (may) 24-dä, gagauz kahramanı miliționer Georgiy SIRTMAÇ, canını kurban koyarak, durguttu ozamankı Moldova kuvetlerin emirinnän, bir sıra terorist aktları yapmak için, Çadır kasabasına yollanan diversiya grupasını.
Miliționer Georgiy SIRTMAÇ, yanındakı milițiya kafadarlarınnan, Çadır kasabasında postta durardılar, açan onnara yaklaştı bir maşina. Durgudup onu, Georgiy SIRTMAÇ yaklaştı o maşinaya da buyur etti şöföru dokumentleri göstersin. Bunun erinä, maşinadan ateş ettilär da Georgiy SIRTMAÇı ölüm biçimindä yaraladılar.
Açan o teroristlär yakalandı, onnar kameraya anaattılar, ani onnarı Moldova kuvetleri yollamışlar Çadır rayonunda birkaç terorist diversiyası yapsınnar. O diversiyaların birisi – Velea-Perji küüyündä bir bulgar, bir gagauz hem bir moldovan evini yaksınnar, bulgar aulunda baararak gagauzça, gagauz aulunda bulgarca hem moldovanca, moldovan aulunda da gagauzça hem bulgarca. Ama bunu aslıya çıkaramadılar, zerä Georgiy SIRTMAÇ gibi kahraman olan başka miliționerlar da onnarı tuttular.
Yıllar geçtiynän Georgiy SIRTMAÇa “Gagauziya (Gagauz Yeri)” odenı veridli (ölümündän sora).
Çadır rayonunda birkaç terorist diversiyası için teroristleri yollayan hem Georgiy SIRTMAÇı öldürdän Moldova kuvetleri da verdilär Georgiy SIRTMAÇa Moldovanın en büük asker ordenını “Ordinul „Ștefan cel Mare”” (ölümündän sora).
Miliționer Georgiy SIRTMAÇın can kurban kahramannıın 30-cu yıldönümünnän hem o uzak günnerin tragediyalı olaylarınnan ilgili olarak, 2022-ci Hederlez ayın (may) 24-dä Çadır kasabasında yortulu anmak sırası yapıldı, neredä anıldılar başka miliționerlär dä, ani insanın raatlıı için cannarını verdilär. Anmak sırada pay aldılar kahramannarın yakınnarı, milițiya veterannarı, polițiyacılar, rayonun öndercileri hem Gagauziyanın Başkankası.
Büünkü gündä Çadır kasabasınında gimnaziya-uşak başçası, bir sokak hem bir çeşmä Georgiy SIRTMAÇ adını taşıyêrlar.
Источник anasozu.com 26.05.2022