İlk basketbol turnirı geçti Komratta
Komratta ceviz ayın 24-25-dä uşakların arasında ilk baskatbol turnirı geçti. Onu hazırladı » Horses Comrat» basketbol akademiyası.Yarışmak Kişinöv hem Gagauziyanın takımnarın aralarında geçti. turnirda pay aldılar 9 yaşından 10 yaşından uşaklar. Biribirinnän yarıştılar takımnar Komrat kasabasından hem Çadırdan, hem dä Kişinövdan. Bu denemäk turnirı oldu,angısı Komradın Kultura Evin önündä geçti. Bitkidä belli edildi ,ani Kişinövun takımı ilk eri aldı,ikinciyi Çadırdakı liţey hem üçüncüdä bulunȇr Gaydarcı liţeyin takımı.
«Komratta basketbol yoktu 26 yıl. Umutlanȇrız,ani o ilerleyecek»,- nışannadı «Horses Comrat» akademiyasının başı Evgeniy Zimovskiy. Akademiyanın administraţıyası plana koydu 4 takım toplamaa 9-10-11-12 yaşında uşaklarlan.Bölä isteerlär diriltmää basketbolu Gagauziyada hem profesional uurunda sportçuları üüretmää.
EVGENİY ZİMOVSKİY «Horses Comrat» akademiyasının başı :»Bizdä bir takım olacȇk te onnara deyni kim istämeer profesional olmaa,ama sever basketbollan zanaatlanmaa. Te onnara deyni kim iştän sora isteer dinnemää çay,kofe içmää hem toplan oynamaa.Ama toplayaceez Milli takımını da, onnarı yollayacıız Moldova Devletindä Milli ligaya».
Tanışmaa basketbollan avtonomiyanın gençleri başladılar street basket sport çeşitindän. Şindiki zaman stritbol sorumnu oldu uşakların,gençlerin, aktiv yaşamayı götürän insannara deyni. Bu sport çeşitindän kendi sport profesional yolunu anılmış basketbolcular başladılar.Ama en önemli — million kişi sokak oyunnarın hatırınnan sevdilär saalıklı yaşamayı götürmää, nışannȇȇr Evgeniy Zimovskiy.
EVGENİY ZİMOVSKİY «Horses Comrat» akademiyasının başı : «Bölä turnirlar sık geçirleneceklär. Hava durumu verer bölä kolaylık. basketbol tukurlaa var, top hepsinä etişecek. Sanȇrım,ani başka erlerdä koyacıız onu. Taa ii olacȇk toplan oynamaa,nekadar barlarda yada başka erdä oturmaa.Bölä gençlär göreciklär,ani var basketbol,geleceklär oynama».
Street basket takımnarında lääzım 4 kişi olsun biri dä lääzım olarsa diiştirsin.Trenerlar nışannadılar,ani turnirın pay alannarı bakmayarak ona,ani profesional uurunda sportlan zanaatlanmȇȇrlar hep okadar üüsek uurda basketbol oynadılar.
» Lääzım biraz da sport çeşitlerini genişletmää. bizdä Komratta en sorumnu futbol.Ama var gençlär,angıları isteerlär basketbol da oynamaa «
«Bizdä basketbol sekţıyaları pek yok yada hiç yok. Sanerım,ani çoçuklar isteerlär basketbol oynamaa. Bu pek meraklı sport çeşiti. Olar sa er,neredä yakışacȇk zanaatlanmaa hem olacȇk trenerlar,angıları üüsek uurda üüredeceklär belliki ayıracam basketbolu».
«Basketbolu ilk serettän sevdim. Bu komanda oyunu. Sayȇrım,ani çoyu geleceydi oynamaa, er turnirlar taa siirek geçirlenärdilär».
Basketbol akademiyasının baş daavası — herzaman ilerletmää sport çeşitleri,angısı uyandırȇr gençlerdä meraklıı zanaatlanmaa sportlan. Nicä sayȇr akademiyanın başı Evgeniy Zimovskiy basketbol harakteri düzer hem terbieder disţıplinayı.
EVGENİY ZİMOVSKİY «Horses Comrat» akademiyasının başı:»İkin soţıal tarafından terbieder. Disţıplina peydalanȇr. Çetinneder harakteri. Sanȇrım,ani hepsiniz isteersiniz uşaklarınız büüsün kaavi . Hem uşaklar topun ardına kaçarkana kendi negativ duygularını ,üfkesini çıkardȇrlar».
Basketbol Komratta 70-ci yıllarda başlamıştı ilerlemää,ozaman kasabada basketbol takımı varmış. Yıllarca bu sport çeşiti unudulmuş, şindiki zaman sade sevennär onunnan zaatlanȇrlar.
Источник grt.md 27.09.2022