“İsteerlär bizi öldürmää!” Komradın yaşayannarı oloyun paalılanması için
Ofiţıal statistika gösterer, ani oloyun paası gün — gündän üüseler. Ekspertlär söleerlär, ani paaların büümesi ansızdan bir iş diil, ama yaşayannar kahırlanȇrlar.
Oloyun paasının ansızdan üüselmesi şaştırdı insanı. Devletin büük tükennerindä oloyun bir litrası 48 leydän 50 leyä kadar büüdü. Komratta kimi satmak erlerdä taa var oloy eski paaylan 40 ley bir litra için. Vatandaşların laflarına görä, paalar 10 leyä kalktı, ama yok ne yapmaa, hep okadar geler sıra satın almaa.
«Ne yapmaa? Şindi hepsi paalı. Pensiya etmeer. Büün çıktık imelik almaa. Bir küçük poşet için 300 ley verdik. Pensiya bitti. Uşaklar yardım ederlär. Nezaman onnar bizä alȇrlar, nezaman biz kendimiz birär şişä alȇrız. Yavaş-yavaş».
«Belli ki, çiftçi bölümündä şindi biraz krizis, ama hep okadar hepsi paalı. Yazık, ama bizdän paalar çekilmeer. Devlet uurunda bölä soruşlar lääzım çözülsünnär. Beki yavaş-yavaş paalar kalkacȇk, ama diil bukadar hızlı».
«Pek paalı. Bizä pensiyada insannara deyni. Pensiyamız az, angı – birinä? Bizim kendi oloyumuz var. Ama kim satın alȇr ne yapacȇk?».
«Nereyi bizim Hükümet bakȇr? Var mı nicä bölä yaşamaa? İsteerlär bizi öldürmää! 2 bin ley pensiya! Bu paraya var mı nicä yaşamaa? Bilmeerim».
Dünnedä paalar kalkȇrlar hem belli edilerlär devletin içindä satılan imäk malların paalarında. Geçän ay imäk malların her bir kategoriyasının paaları 27% üüseldilär — bitki 22 yılın içindä bölä paalar yoktur oldu, nışannadı ȇkspert Väçeslav İoniţȇ.
«Moldovaya imäk malların taa çoyu Ukrainadan gelärdi. Onnarın arasında oloy da vardı. O pek paalı, bizdä satılmazdı. Bir taraftan karşı geldik paaların üüselmesinnän, öbür taraftan ucuz mallar da tükennerdän kaybeldilär. İnsanda iki taraftan da kayıp oldu», — söledi ȇkspert.
Moldovada soţial önemli imäk malların listesi var, angılarına paa maasuz normalara görä kurulȇr. Bölä karara geldi hükümet, açan paalar sebeplän hem sebepsiz başladılar büümää, ki durgutmaa bu proţesi. 2022-ci yılın küçük ayında soţial listenin malların sayısı genişlendi: domuz hem kuş yaanıları, don balık, şeker, yımırta, kartofi, suvan, laana, morkva hem çukundur eklendilär, ama oloy onarın arasına girmeer. Onuştan da satıcılar paayı kurarkana oloya bu karara aardılmȇȇrlar.
Источник grt.md
