Haydar küüyülü el ustası Zinaida Gagauz örmä palacıklarınnan anıldı taa aşırıda
Halkın kulturası hem ruh zenginnii onun yaptıklarından, sözündän, yaratmalarından, el işlerindän annamaa var nicä. Kendi unikal el yaratmalarınnan diil sade Gagauziyada, ama Moldovada hem aşırıda anılȇr Haydar küüyünün yaşayanı Zinaida Gagauz. Alöna Terzi yakın tanıştı ustanın yaratmalarınnan.
Zinaida Gagauz taa küçüklüündän babusunnan hem anasınnan barabar koraflı pala hem kilim dokaarmış. Ama düzennär vakıdı geçtiktän sora Zinaida kararlȇȇr kukaylan başlamaa pala yapmaa.
“Açan kaybeldilär düzennär, bän çekettim bunnarı örmää. Savaşȇrım örmää ölä sıkı, ki olsun sansın dokuma. Ani attıynan onnarı çamaşır maşinasına, onnar daalmasınnar da bozulmasınnar. Bölä ördüynän kaavi olȇrlar”, — annadȇr el ustası.
Zina bulünün palaları anıldılar diil sade Haydar küüyündä, ama aşırı devletlerdä dä. Vatandaşlarımız yabancılıktan gelip, dayma Zina bulunun işlerinnän meraklanȇrlar alıp yannarına, çünkü onun palaları gibi yok birerdä. Zina bulünun örgü tehnikası unikal, renkleri dä koraflar için iiyicä inceleyip ayırȇr.
“Kendi aklımdan çıkarıp, hertürlü renk hem koraf yapȇrım. Kimär sıra, insan istärsä, birtürlü da yapȇrım. Var her türlü, ama bana taa uygun tombarlak örmää, insannar taa çok bölä isteerlär. Ama var nicä dört köşeli, uzun da yapayım. Nesoy insan isteer ölä da yapȇrım”, — açıklȇr Zina bulü.
Zinaidanın en büük sevinmelii büün o, ani bu zanaata o üüretti kendi oolunu, kızını hem büün pala örümesininnän meraklanȇr onun torunu da.
“Bän yazın dışarda oturup örerim, bän kalktıynan, onnar alȇrlar ellerinä kukaları. Çocuum şansora büük, popaz işleer, ama o da taa kimär sıra alıp, başlȇȇr örmää”, — annadȇr usta.
Palacıkları örmää deyni vakıt hem dayanmak lääzım. Kimär sıra bir palacıın yapılması bir aftadan aya kadar var nicä uzasın.
Источник grt.md
