Halk Topluşunda hazırladılar iniţiativayi yardım için yufka durumda insannara kışın
GHT başın yardımcısı Aleksandr Tarnavskiy Gagauziyanın zor halda bulunan yaşayannarına yısıtmak vakıdında finans yardımın verilmesi için kanon proektini teklif etti. Proektin baş daavaları hem neetleri için o Gagauz adiosunun cannı yayında programasında açıkladı. Derindän ilerki süjedımızda.
O üzerä, ani energetika mallarına paalar gün — gündän üüselerlär da bu proţes hiç durgunmȇr, Gagauziyanın çoyu yaşayannarı ödeyämerlär kullanılan koşullar için. Bu üzerä GHT başın yardımcısı Aleksandr Tarnavskiy «KALİTELİ YAŞAMAK» fondun kurulması için kanon proektini teklif etti. Bu kanon, umutlanȇr deputat, yardım edecek makar bir damna ilinnetmää insanın harçlarını yısıtmak vakıdında. Soţial yardımını teklif ediler 1 bin leylik yapmaa. Bu para verilecek aylenin herbir temsilcisinä, angıların ay parası 2,5 bin leydän az.
ALEKSANDR TARNAVSKİY, GHT başın yardımcısı: «Bıldır taa programa işlettirildi, nesoy insana var nasıl yardım etmää, o vakıt açan sade başladı gazın paası üüselmää. İniţiativa Gagauziyanın başkanına hem bakannık komitetinä yollanıldıydı, ama tutturulmadı. Biz sä bakannık komitetsiz kanona görä yok nasıl büdjeda diişilmekleri giriştirelim. Onuştan lääzım oldu bu ideyayi enidän teklif etmää, ama şindän sora kanon proekti gibi hem mehanizmayi belli etmää, da enidän bakannık komitetinä yollandırmaa».
Örnek gibi, Aleksandr Tarnavskiy Kişinöv muniţipiyasını getirdi, neredä kasabanın kuvetleri yardım ettilär finans tarafından yaşayannara energetika mallarını yısıtmak vakıdında ödemää. Bu üzerä insan okadar sert duymadı malların paalılanmasını bu kış. Bu takım adımnarı, düşüner deputat, Gagauziyanın da kuvetleri lääzım yapsınar. Yardım gibi o «KALİTELİ YAŞAMAK» fondun kurulması için sızıntıları bellietti.
ALEKSANDR TARNAVSKİY, GHT başın yardımcısı: «İki variant var nesoy bu kanonu giriştirmää, er büdjedı doldurtmaa küçüldüp kimi başka programaları, angıları diil okadar önemli kış vakıdında. Bu yol diil okadar ii. Ya ikinci variant da var — avtonomiyanın başı, bakannıı başlȇrlar gitmää başka devletlerä, buluşmakları geçirmää. Diil dilenmää finans yardımını, ama diplomatiya tarafından laflaşmaa yardım için. Deelim kär Türkiye devletinä dä, angısına deyni biz kardaş halkıyız. Lääzım açık sölemää, ani kışın kimi insan var nasıl suuktan üşüsün».
Yısıtmak vakıdı için soţial finans yardımını, kanon iniţiativasına bakarak, 15-20-dän avtonomiyanın aylesi var nasıl kabletsin. Bütünnä gelän fondun büdjedı 75 miliondan 100 milion leyädän var nasıl etişsin, bu para Gagauziyanın 2022 yılın büdjedın yakın 33 proţendı. Bu adımnar, sayer Aleksandr Tarnavskiy, pek önemli hem lääzımnı neçin ki risk var, ani kimi yaşayannar gelän kışa üşüyeceklär, neçin ki paraları gazın ödemesi için etişmeyecek.
prevyu: kp.md
Источник grt.md 02.08.2022