Halk Topluşun deputatları teklif ederlär diiştirmää Bakannık komitetin strukturasını
Komratta Bakannık komitetin işi için kanona görä geliştirmelerinä cümnä okumakları geçti. Eniliklerä görä lääzım olacek birkaç bakannıkları birleştirmää, M. Maruneviç adına Bilim-Aaraştırmak merkezini hem İnvestiţiya agenstvosunu çıkarmaa Bakannık komitetindän. Te bu enilikleri deputatlar teklif ettlilär kabletmää.
Reglament komisiyanın başı ,Gagauziya Halk topluşun deputatı Mihail Jelezoglo nışannadı,ani “Bakannık komitetin işi için” kanonuna enilikleri Gagauziya Halk topluşun başın yardımcısı Georgiy Leyçu teklif etti kabletmää. Deputatlar isteerlär 2018-ci yılda kabledilmiş Bakannık komiteti için kanonu diiştirmää.
MİHAİL JELEZOGLO GHT reglament komisiyasının başı: «İsteeriz belli etmää bir sıra kriteriya hem sorumnarı Bakannıık komitetin azalarına. İlerdän onar yoktu. Bakannık Komitetin azası hem bakan var nicä olsun kişi, angısı Moldova vatandaşı, läzım çalışsın, Gagauziyada yaşasın hem gagauz dilini bilsin. Herbir azada lääzım olsun üüsek bilgilär için dokument hem staj bu sferada 3 yıldan zeedä. Bän sayȇrım, ani bu kriteriyalar önemli».
Gagauziya Halk Topluşun deputatı İlya Uzun nışannadı,ani bakannık komitetin azalarını lääzım diiştirmää hem bakannıkları iisiltmää. Onun laflarına görä GHT büceti 9 million ley,ama Bakannıık komitetin 58 million.
İLYA UZUN, Gagauziya Halk Topluşun deputatı: «Prost edin, ama bukadar çok devlet çalışannarını lääzım doyurmaa da. Sıradan insan nekadar lääzım işlesin sizi doyurmaa deyni?- Nicä çırak. Biraz da esap olsun».
Bakannıık komitetin başın yardımcısı Olesä Tanasoglo nışannadı, ani komitetin azalarını toplȇȇr hem teklif eder onun başı.O teklif etti deputatlar saygı gütsünnär kuvedin herbir uurunda bulunan temsilcilerinä hem karışmasınnar avtonomiyanın başın işinä.
OLESÄ TANASOGLO, Bakannık komitetin başın yardımcısı: «Maana bulmaa kolay, ama lääzım bakmaa neylän zanaatlanȇr herbir bakannıık hem işin çıkışlarına. Hem taa lääzım aklımıza getirelim kuvetlerin ayırılması prinţiplerini, hem kim ne için cevaplı. Sayȇrım, ani bu iniţiativa tehnik tarafından var nicä esaba alınsın, beki statyaların sıralanması aktual olacek. Ama avtonomiyanın öndercilik organnarın kurulması, Bakannık Komitetin strukturanın yapılması – başkanın işi. Onuştan sayȇrım, ani bu yannış iniţiativa».
Deputatlar teklif eder M. Maruneviç adına bilim-aaraştırmak merkezini hem İnvestiţiya agenstvosunu çıkarmaa Bakannık komitetin strukturasından.
İRİNA KONSTANTİNOVA, M. Maruneviç adına Bilim-Aaraştırmak merkezin başı: “Biz büün lafederiz, neredä lääzım olsun Bilim-Aaraştırmak merkezi, nicä lääzım kurulsun onun ilişkileri Bakannık Komitetinnän hem Halk Topluşunnan, çünkü bu pek önemli. Sizdä var çok komissiya, angıları bakȇrlar kanon proektlarını. Ama te o işlär bilim uurunda, angıları var bizdä, sizä deyni dä olaceklar faydalı”.
NATALYA KOJOKAR, İnvestiţiya agenstvosunun başı: “Siz sölersiniz, ani ştatlar hem bücetlär büük. Agentstvomuzda işleer 6 uzman, da geçmiş yılda Gagauziyaya geldi 24 mln-dan zeedä yatırımlar kompaniyalardan Germaniyadan, Türkiyedän, Moldovadan”.
Bakannık komitetinä girerlär üç dolayların öndercileri dä. Gagauziyanın maasuz statusu verer kolaylık regionun kuvetleri kendileri erli administaţıya temsilcilerini ayırsınnar hem ȇkonomika — politika soruşlarını çözsünnär, çizgiledi Komrat dolay administraţiyasının başı İvan Topal.
İVAN TOPAL, Komrat dolay administraţiyasının başı: «Siz Bakannıık komitetin işinä karışȇrsınız. Siz hepsiniz büceti baktınız. Deputatlar kablederlär büceti, Bakannıık komiteti dä onu teklif eder. Siz yarım yıl ucunu bulamadınız, şindi da başkasının işinä karışȇrsınız. Bu diil dooru».
Gagauziya Halk Topluşunda 45 kişi çalışȇr, Bakannıık komitetindä sä 300-dän zeedä.
Источник grt.md
