Halk Topluşu kabletti 2022 yıla Gagauziyanın bücetini
GHT oturuşunda kabledildi 2022-cı yıl için bücet kanonu. İkinci soruş ilişti gagauziyanın Merkez Seçim Komissiyasına bina verilmesi için.
Bakarak 2022-cı yıl için teklif edilän bücet proektini kimi deputatlar nışannadılar, ani o уsaba almȇȇr Gagauziyanın yaşayannarının istediklerini. Kıpçak küüyünün deputatı Valeriy Manastırlı nışannadı, ani o vermeyecek sesini bu kanon için, çünkü o karşı koyȇr uşaklarlan baalı soruşlara.
“2022-ci yılda Kıpşakta bir uşaa 26 910 ley. Gagauziyanın başka küylerindä sä 30 668 ley. Bölä/ Kıpçaan uşak başçalarına verilmedi 2 mln.213 bin ley. Biz maana bulduk o deputatlara, angıları geçti yıl insannara karşı koyan büceti kablettilär, ama bän büün yok nicä kendi sesimnän gideyim uşaklara, ana-bobalara hem terbiedicilerä karşı. Bän yok nicä vereyim sesimi ölä kanon için, angısı uşakların imeesini böler”, — söledi Kıpçaktan deputat.
2022-ci yılı bücet kanonun dolayında dartışmaklar en ilkindän başladılar ondan, ani deputatlar sayȇrlar Bakannık komitetindä çalışan uzmannarın sayısını pek büük. Gagauziyanın Finans bakannıın başı Tatyana Doyçeva nışannadı, ani Bakannık komitetin finanslamasının aazaltması var nicä büük problemalara getirsin.
“Bizdä insannarın ay kazancını ödemäk için finans canavar ayın ortasında taa bitecek. Biz lääzım olacek durgudalım işimizi. Bölä durum, inanınız, herbir bakannıkta olacek”, — dedi Tatyana Doyçeva.
HT başın yardımcısı Aleksandr Tarnavskiy nışannadı, ani Bakannık komitetinnän teklif edilän bücetin sade 5%-dini diiyştirmää teklif ederlär.
“İsteerim nışannamaa, ani Bakannık komitetinnän teklif edilän 300 mln leydän, diyştireriz sade 15 millionu. Bu kurȇr sayının 5%-dini”, — nışannadı Aleksandr Tarnavskiy.
Bücetä görä 2022-ci yıl için bücet proekti zeedeleder Gagauz dilinin ortamın genışlenmesi kanonun finanslanmasını da.
“Pek islää, ani bu kanonan 5 mln. ley veriler. İsteerim burada esaba alınsın GRT CK-sı da. Gagauz dilindä programaların yapılması, filmnerin hem çizgi filmnerin gagauz dilinä çevirilmesi hem gagauz dilindä işleyän uzmannar da desteklensinnär lääzım. Gagauz dili hererdä lääzım işidilsin, hem biz bu işä yardım edelim lääzım ”, — teklif etti Kazayak küüyündän deputat Aleksandr Dülger.
Kanona görä 2022-ci yılda aazalȇr industrial kolecin düzülmesi için hem eni stadionun işini götürmäk için finanslar.
“Bana kalsa biz diil lääzım dokunalım bu obyektlerä. Biz bileriz, ani onnarı adadılar başarmaa geçan yıl, ama bakın nesoy pandemiya bizdä oldu, kaç insan biz kaybettik! Elbetki finanslar bu uurdan başka uurlara verildilär. İkinci — unutmayanız, ani bu proektleri biz gerçeklederiz bizim halklararası dostlarımızın yardımınnan. Biz bu işi yaparsaydık, sora nesoy investor bulacez?”,- sordu Kongaz küüyündän deputat Svetlana Düvenji.
Lafedärkana bücet için deputatlar seçtilär karar stadionun işini götürmäk için finansları kesmää. İki kat aazaldı MD tek at fermasının finanslanması da.
“2016-cı yıldan beeri biz işideriz, ani onnar başlȇȇrlar kendi-kendilerini finanslamaa. Bunu her yıl işideriz. Onnar uşakları da tezdä ilaçlamaa çekedeceymişlär. Açan biz onnara para dooru başlayacez vermää, ozaman da onnar kazanmaa başlayaceklar. MD sayı palatası çoktan taa hem diil bir sıra söleer bizä, ani biz bunnarı dooru finanslamȇȇrız”,- nılannadı Halk Topluşun başı Dmitriy Konstantinov.
Deputatların taa çoyu verdilär kendi seslerini bücet kanonu için 2-ci hem 3-cü okumakta. Bölä 2022-ci yıl için Gagauziyanın büceti kuracek 1mlrd.110 mln ley.
Источник grt.md
