Halk Topluşu en küçük çana yavaşıcık urdu. Gagauziya Başkanı bunu da yapmadı.

Harman ayın 24-dä Moldova Parlamentında “Moldova Respublikasının Prokuraturası için” zakonuna diiştirmekleri ikinci hem son okumakta kabledilmesindän sora, Gagauziya Başkanı İrina VLAH, bu uurda biraz dalga yapmak için, eşinmää başladı, bileräk ani artık geç, çünkü Zakon geeri dönmäz. Ama bu eşinmelärlän Gagauziya Başkanı kiminsa önündä suratını kurtarmaa pek isteer (bak: https://gagauzinfo.md/top1/61722-bashkan-irina-vlah-nastaivaet-na-vklyuchenii-prokurora-gagauzii-v-sostav-vsp.html). Açan Harman ayın 13-dä Moldova Parlamentı tarafınfan ilk okumakta kabledildi “Moldova Respublikasının Prokuraturası için” zakonuna diiştirmeklär, neredä belli oldu, ani kuvettä bulunan partiya Gagauziyayı temeldän sökmää başladı, Gagauziya Başkanı İrina VLAHtan buna karşı bir “gık” ta çıkmadı. Taa da beter, ançan lääzımdı çannarı düümää hem büünkü eşinmeyi yapmaa, Canabisi kırları gezärdi…

Harman ayın (avgust) 28-dä tipardan çıktı “Ana Sözü” gazetasının 2021-ci Harman ayın (avgust) nomerı. Nomerdä tiparlanan materiallar: “Gagauz Respublikasının 31-ci yıldönümü bakıldı”, “Moldova Respublikası baamsızlıının 30-cu yıldönümünü kutladı”, “Ana dilimizi başka dillerä kurban etmeyelim!!!”, “Gagauziyayı temeldän sökerlär – Gagauziyanın garantı kırları gezer”, “Bir gagauza hem bütün Gagauziyaya karşı bir zakon”, “Tren gittiynän Gagauziyanın garantı Gagauziya Başkanı eşinmää başladı”, “Gagauz Respublikasının erinä Gagauziya Başkanı Romıniyada kefinä baktı”, “Halk Topluşu en küçük çana yavaşıcık urdu. Gagauziya Başkanı bunu da yapmadı”, “Son hazırlanmış, ama dünneyä etişmeyän 2002-ci yılın “Kırlangaç” jurnalın nomeri”, “İlya FİLEV 65 yaşında”, “Elena KILÇIK: “Pek kısmetliyim, ani Olimpiada Oyunnarına katıldım!””…

Bakmadaan ona, ani Gagauziyanın büünkü Başkankası pek istämeer, Gagauziya Halk Topluşu aldı karar, ani sıradakı Gagauziya Başkanı seçimneri yapılsın 2023 yılın Çiçek ayın (aprel) 30-da. Gagauziya Halk Topluşu kendisinin 16.08.2022 günü toplantısında, ansızdan, 20 halk deputatın kayıllıınnan, karar aladı Gagauziya Başkanı seçimneri 2023 yılın Çiçek ayın (aprel) 30-da yapmaa. Buna karşı kalktı Gagauziya İspolkomun Predsedatelin ikinci yardımcısı Olesä TANASOGLU, urgulayıp, ani bu büük yannışlık, çünkü, maamilä surat, Başkankanın zamanı 2023-cü yılın Orak ayın (iyül) 19-da bitärmiş. Источник anasozu.com

Moldova Parlamentın Predsedateli İgor GROSU hem Gagauziya Halk Topluşu Başı Dimitriy KONSTANTİNOV Küçük ayın (fevral) 14-dä aralarında bir telefon dialogu kurdular. Nicä açıklandı, Moldova Parlamentın Spikerı İgor GROSU, Gagauziya Halk Topluşu Spikerına Dimitriy KONSTANTİNOVa, işlerindä hem çalışmalarında başarılı olsun diledi. İki spiker annaştılar, ani Gagauziya (Gagauz Yeri) avtonomiyasının yaşamasını Moldova Respublikasının Konstituțiyasına görä kurmaa hem 1994-cü yılda kabledilän “Gagauziya (Gagauz Yeri) özel hak statusu için” Zakonuna görä Moldova zakonnarını erleştirmää deyni Moldova hem Gagauziya arasında kurulan parlamentlar arası çalışmak grupası çerçevesindä dialogu enidän başlatmaa. Taa ileri bu grupa hep kara yımırta yımırtladı, bak: http://anasozu.com/komisiya-angi-yimirtayi-yimirtlayacek-biyazi-mi-karayi-mi/ http://anasozu.com/parlament-komisiyasi-calismak-grupasi-kara-yimirtayi-yimirtladi/ http://anasozu.com/parlament-komisiyasi-bir-kara-yimirta-yimirtlayip-gagauzlara-taa-bir-kera-gulmaa-aldi/ http://anasozu.com/gagauzlara-taa-bir-kara-yimirta-bu-kera-moldova-delegatiyasindan-espada/ http://anasozu.com/kara-yimirtalar-biyaza-donecek-mi-sanmeeriz/ Источник anasozu.com

Baba Marta ayın 21-dä Gagauziya Halk Topluşu Başı Dimitriy KONSTANTİNOV bir saygı vizitlan Türkiye Kişinev Büükelçiliindä buluştu Türkiye Kişinev Büükelçisi Gürol SÖKMENSÜERlän. Büükelçi Gürol SÖKMENSÜER Gagauziya Halk Topluşu Başına hem eni seçilän deputatlarına çalışmalarında başarılar diledi hem Türkiyenin dayma Gagauz soydaşlarına yardım olmak için, büünkü günä kadar olduu gibi, bundan sonra da elindän geleni yapacaanı urguladı, bildirer T.C. Kişinev Büükelçiliin https://www.facebook.com/kisinevbe sayfası. Источник anasozu.com