Halk Topluşu deputatları enseyebildilär Başkanın yasaanı sade bir kanonda
Gagauziya Halk topluşu deputatları kendi oturuşunda 3 kanon baktılar, angılarını başkan geeri urdu. «Deputatın statusu için» hem «Bakannıık komiteti için» kanonnar için laf gider. Te o kanonnar, angılarını imzalamadı Gagauziyanın Başkanı, Gagauziya Halk topluşu maasuz oturuşunda baktı. Deputatlar Başkanın yasaanı ensedilär kanonda, angısına görä Bakannıık komiteti azaları kabledärdilär 6 oklad otstavka için. Şindi iisilttilär ikiyä. Ama deputatlara deyni okladların sayısı iisilmedi. Soruşlarda, angıları baalı bakannıık komitetin azaların gagauz dili bilmesinin lääzımnıınnan hem Bakannıık komitetin içindä bölümnerin azaltmasınnan, deputatlar başkanın yasaanı enseyämedilär.
Gagauziya Halk topluşu oturuşunda deputatlar geldilär karara, ani Bakannık komitetin 6 okladını iisilderlär ikiyädan azalar iş görevindän çıkarkan. Bu soruşta 25 deputat kendi kayıllıını verdi.
«Neçin Moldova Devletin Hükümeti gitti başka yoldan? Biz dä kendi tarafımızdan neçin lääzım onnara karşı gidelim? Onnar denedilär ölä çalışmaa. Bän teklif ederim kollegalarım esaba alsınnar kanonun yüridik tarafını. Biz çetin duracez kendi bakışımızda. Diil önemli, angı Bakannıık komitetin azaları 6 oklad kabledeceklär. Bunnar mı, o sa öbürleri mi, ama biz kanona görä lääzım çalışalım. İnsan da lääzım bilsin, ani var te bölä kurallar hem kanonnar», — nışannadı GHT başının yardımcısı Georgiy Leyçu.
Deputatlar sa ileri dooru altı oklad kabledeceklär onnar kendi görevindän çıkarkan. Ama kanon kurucuları adadılar, ani deputatların da okladların sayısı iştän cıktıynan diişicek, onnar neetlenerlär bakmaa bu soruşu 3 aydan sora.
Bu soruşları temsil etti bücet hem finans komissiyasının başı Nikolay İvançuk. O nışannadı, ani deputatlar da lääzım birkaç posobiyadan ret etsinnär. Bu soruşta sesini 20 deputat verdi. Ama başkanın yasaanı ensemää deyni lääzımdı 22 ses.
«Yazık, ani kollegalarımız bizimnän diil kayıl bu soruşta. Bu iisiltmeleri istedik yapmaa ki korumaa deyni bücet paralarını. Zor vakıt. Bu para artırmaları lääzım. Ama bizi kollegalarım annamadılar. Ama o onnarın hakı», — söledi Nikolay İvançuk.
Deputatlar nışannadılar, ani başkan hem onun temsilcileri biri dä Gagauziya Halk topluşu oturuşuna gelmedi.
«İlk lafı lääzımdı verelim Başkana,ama o yok. Onun temsilcileri dä yok. Biz teklif ettik, ama onnar gelmedilär», — söledi GHT başı.
«Bakannıık komiteti için» kanonu bakarkana Gagauziya Halk topluşu deputatları Bilim — Aaraştırmak merkezini hem investiţıyalar Agentstvosunu Bakanık komitetindän çıkarmaa lääzımnıını açıkladılar. Deputatlar taa nışannadılar, ani Bakannıık komitetin azaları lääzım bilsin gagauz dilini. Bu soruşları açıkladı reglament, deputat etikası herzamankı komisiyasının başı Mihail Jelezoglo.
«Gagauz dili gagauzluu nışannȇȇr. Kuvetlerin ön daavası — gaguz dilini ilerletmää, onun kullanmasını genişletmää. Bu laflar Gagauziyanın baş kanonundan alınma. Bu kanona görä lääzım başkan da, Bakannık komitetin azaları da çalışsınnar», — söledi Mihail Jelezoglo.
Soruş, angısı baalıydı Bakannık komitetin azaların gagauz dilinin bilmesinnän kavgalara getirdi. Deputat Demyan Karaseni nışannadı, ani Gagauziyanın baş kanonuna görä avtonomiyada 3 dil çalışȇr: gagauz, moldovan hem rus. Onun laflarına görä, ayırarkana Bakannıık komitetin azalarını, lääzım bakmaa onnarın professional uuruna.
«Sayȇrım, ani Gagauziyanın baş kanonuna karşı gideriz. Biz şindi esaba almȇȇrız te o küüleri, neredä yaşȇrlar bulgarlar, gagauzlar yannaşık: Rus Kiseliyası, Ferapontyevka, Bucak», — söledi Demyan Karaseni.
«2018-ci yılda kabledildi kanon, neredä yazılı, anı Bakannıklarda çalışan insannar lääzım bilsinnär gagauz dilini. Nokta!», — cevap verdi ona GHT başı.
«İsteerim sölemää, ani soruş genä kalktı milletlik için. Bitki-bitkiyä kimsä cezalanacȇk ,ani kavgalar kalkȇrlar. Biz bir sıra da insanın milletlii için bişey sölämedik. Ani dili lääzım bilsinnär, o var Gagauziyanın kanonnarında. Ama siz istäärseydiniz biz bu punktları silelim kanondan ,biz onnarı silecez», — söledi Georgiy Leyçu.
Bu soruşta sade 21 deputat sesini verdi. Etişmedi sade bir ses ki başkanın yasaa ensenilsin. Bakannık komitetin strukturası hep ölä kalacȇk. Sorumnar da onun azalarına eski kaldılar.
Источник grt.md
