Halk Topluşu 2022-ci yılın bücetını kabledip, İspolkomun tamahlıını biraz aazalttı
Ani büünkü günädän Gagauziya başkanı harcardı Gagauziya halkının (oku: Gagauziya bücetinin) parasını ölä nicä istärdi, sansın baltada bin domuzu varmış gibi, hepsicii bilärdi hem hiç biricii buna karşı koyamazdı, çünkü şindiyädän Halk Topluşunda Gagauziya Başkanın cep deputatları hep vardı da Canabisi, istedii ipi çekip, onnarı marionetka kuklalarını gibi kullanardı hem istedii kararı kablettirärdi: haliz paranın pek raat hem bol-bol aşırtmasını uurunda. Ama şindiki Halk topluşun deputatları buna son koydular.
Çiçek ayın (aprel) 8-dä Gagauziya Halk Topluşu kendisinin maasuz toplantısında kabletti Gagauziyanın 2022-ci yıla bücetını, uzaklaştırıp onu İspolkoun tamahlıınıdan hem yakınnaştırıp küülerin hem insannarın zorluklarına.
Belliki, ilkin laf gider Bücetin doorudan harcamaların 15,8 milion leyi kesilmesi için, angısının içindä bulunêr:
– 11,0 milion ley – İspolkomun beslenmesindän (komandirovkalar, serviç harçları, serviç transportu h t.b.);
– 4,8 milion ley başka işlerdän:
- Komratta Türkiye tarafından yapılan eni stadionun ayakta tutulması – 2,1 milion ley;
- Gagauziyanın Merkez Seçim Komisiyası – 900 bin ley;
- “At-Prolin” firması – 679 bin ley;
- “Vesti Gagauzii” gazetası – 496 bin ley;
- Kultura sıraların yapılması – 838 bin ley;
- İnvestițiya forumun yapılması – 211 bin ley.
Bu 15,8 milion ley parayı Halk Topluşu taa lääzımnı işlerä yolladı:
- Gagauz dilin kurtarılmasınna – 5,0 milion ley;
- “Aydınnadılmış küü” programasına – 4,8 milion ley;
- Çiftçilerin Fonduna – 4,0 milion ley;
- Yangınnarı sündürmäk bölümnerinä – 1,4 milion ley;
- Gagauziya futbol çempionatına – 600 bin ley.
GHT kayıl olmadı onunnan da, ani İspolkom 2022 yılı bücetindä Temel yatırım programaların sade 22,0 milion ley ayırmış hem hemen o paraya kendi programalarını da teklif etmiş. O üzerä Halk Topluşu bu programalara 35 milion ley ayırdı hem karar aldı o paraları, kardaş payı yaparak, regional hem erindeki proektlara payetmää.
Halk Topluşu kısalttı 20% İnvestițiyaları çekmäk Agenstvosunun parasını da, yonup 2,5 milion leydän 500 bin ley.
İspolkomun hem GHTnın rezerva fondları da, neredä sä, denkleştirildi: 4,9 milion ley hem 2,1 milion ley yapıldı 3,8 milion ley (İspolkoma) hem 3,2 miliin ley (GHTya).
Belliki, Gagauziyanın üürencileri dä, 1-ci klastan taa 12-ciya kadar, unudulmadı – onnarı yılın sonuna kadar parasız doyurmak için bücetä karar koyuldu.
Источник anasozu.com
