Georgiy Leyçu parlamentlar arası iş grupası için: «Büük başarlara taa etişämedik»
Moldova Parlamentin hem Gagauziya Halk topluşun deputatların iş grupasının oturuşunda avtonomiya kanonnarınnan baalı soruşları baktılar.
Moldova Parlamentin hem Gagauziya Halk topluşun deputatların iş grupasının azaları geldilär ii çıkışlara uzun vakıttan sora, nışannadı GHT viţe-spikerı Georgiy Leyçu. Oturuşta bakıldı kanon proektleri, angıları baalı parlamentin reglamentinnän hem başka kanonnarlan, angılarına görä avtonomiya yaşȇȇr.
“Siz bilersiniz, ani kanonnar, angılarını devlet kableder, pek sık Gagauziya hak statusu kanonunnan uymȇȇrlar. Biz istämeeriz bu soruşta merkez kuvetlerinä karşı gitmää, lääzım bu durumadan getirmemää, ama problemaları çözmää”, — açıkladı Georgiy Leyçu.
Gagauziya Halk topluşun deputatları isteerlär, ki herbir kanon, angısını devlet kuvetleri kabledeceklär, avtonomiya kuvetlerinä verilsin bakılmaya hem deputatlar kendi bakışını ona açıklasınnar.
“Biz bileriz, ani bakışımızı açıklarkana hep okadar onu beki esaba almayaceklar, ama makar söleyecez, ne düşüneriz bunun için. Hem çalışacez ölä yapmaa, ki haklarımızı hep okadar korumaa”, — söledi Georgiy Leyçu.
GHT deputataların bakışlarına görä konsultaţiya proţesleri vererlär kolaylıı Moldova hem Gagaguziya kanon kurucularına taa açık annamaa biri birini. Georgiy Leycu çizgiledi, ani pek çok onnarın iş grupası taa yapmadı, ama adım- adım yaklaşȇr kendi neetlerinä.
“Bizdä pek çok teklif var, ama diil herzaman kollegalarımız Moldova Parlamentindän bizi annȇȇrlar, hem diil herzaman hazır bizi tutturmaa. Biz bu soruşlara pek çok vakıt harcȇȇrız. Gagauziyadan deputatlar bütün Halk Topluşunun bakışını açıklȇȇrlar, ama Moldova deputatları nışannȇȇrlar o frakţiyaların bakışlarını, angıları onnarı orayı koydular”, — annattı deputat.
Politolog İgor Boţan sayȇr, ani iş grupasının kurması bu ii nışan. Deputatlar lääzım barabar çalışsınnar.
“Yoksa ilerlemäk,lääzım kimi sä halklararası kurumnarından bulmaa, ki bu ekspertlär yardım etsinnär bulmaa çıkışı da iş gitsin. Lääzım taa dayanıklı olmaa da annamaa, ani bu proţes diil hızlı, ama dooru lääzım geçsin”, — sayȇr politolog.
Moldova hem Gagauziya deputataların iş grupasını kurdular 2015 ci yılda. Ona girer edişär deputat devlet hem avtonomiya taraflarından.
Reportörlar: M. Statova,T. Stavilova
Video: V. Tabaçuk
Kurgu: A. Topal
preview: gagauziadialogue.md
Источник grt.md
