Genä tutsak etmää başladılar: onnara vakıdı uzatmaa lääzım
Kasımın 15-dä Kişinev Apeläțiya Palatası başladı incelemää Moldova Baş prokuroru Aleksandr STOYANOGLUnun advokatlarının danışmasını, ani Canabisini serbest brakmaa deyni.
Aleksandr STOYANOGLUnun tarafı urgulêêr, ani o bir kabaatsız tutuklandı da onu lääzım serbest brakmaa. Aleksandr STOYANOGLUya karşı uydurma işi açan prokuror sa buna karşı çıkêr.
Aleksandr STOYANOGLUnun advokatları karşı çıktılar sudta pay alan daavacıya Genadiy MOROZONa, Vlad PLAHOTNÜKun kayunçusuna, da teklif ettilär bu daavacıyı diiştirsinnär.
Birkaç yıl geeri bu daavacı için “ZdG” gazetası yazdıydı, ani “Genadiy MOROZON “cendemdän” sekiz daavacının arasındaydı, angıları prokurorların danışmalarına görä, polițiya komisariatlarında sud kesärdi 2009-cu yılın Çiçek ayın (aprel) 7-dä protest yapan insannara”.
Kişinev Apeläțiya Palatasının toplantısının önündä Moldova Baş prokuroru Aleksandr STOYANOGLU presaya deyni birkaç aşıklama yaptı, neredä urguladı, ani “Moldova Prokurorların Üüüsek Soveti politika organı oldu”.
Söleyeräk o pres-konferențiya için, angısını o lääzımdı yapsın tutuklama günündä, Aleksandr STOYANOGLU dedi, ani orada o istärdi kendinin kabaatsız olmadıınnan ilgili bilgileri açıklamaa” – https://www.youtube.com/watch?v=fM75O9KBFEA.
Kasımın 15-dä Kişinev Apeläțiya Palatası Moldova Baş prokuroru Aleksandr STOYANOGLUnun serbest brakılmasınnan ilgili karar almadı da toplantıyı Kasımın 16-na geçirdi. Belli, ani neredän sa gelen emirlerä görä mi, osa kendilerinin raatlıkları için mi, ama Apeläțiya Palatasının daavacıları, işi genä tutsak ederäk, vakıdı uzaldêêrlar.
Kolaj: point.md
Источник anasozu.com 16.11.2021