Geçindi «Düz Ava» türkü hem oyun ansamblisinin horeografı Konstantin Germek
Konstantin Afanasiyeviç Germek geçindi aprelin 2-dä. Bu yıl o olaceydı 70 yaşında.
Konstantin Afanasiyeviçin zaameti Gagauziyanın professional oyun uuruna paasız. O çok işledi deyni ilerletmää bu bölümü. Onnan yaradılmış oyunnar Gagauziyanın istoriyasına yazılaceklar.
«Düz Ava» ansamblisinnän işläärkana Konstantin Germek koydu 10 halk oyunu. Onnar haliz halk muzikanın, giimnerin hem oyunnarın spektaklileri oldular, üüsek professional uurunda gösterilän hem dünnedä unikal olarak. Onarın arasında “Kız oyunu”, “Baada”, gagauz adet oyunu “Düün”, «Köstek oyunu», adam oyunu «Çöbannar», «Molduvan süitası», «Valkaneş kadıncası», üç bölümlü «Gagauz süitası», «Dostluk oyunu», «Bulgar süitası».
“Konstantin Afanasiyeviçin professionallıınnan hem paasız zaametinnän büün «Düz Ava» gagauz türkü hem oyun ansamblisi Moldovanın gagauz professional horeografiya incä zanaatı uurunda liderların biri oldu. Kultura bakannıı açıklȇȇr acızgannıını Konstantin Afanasiyeviçin zamansız geçinmesinnän onun hısımnarına hem yakınnarına. Konstantin Afanasiyeviç aklımızda hem canımızda sonsuz yaşayacek”, — nışannadı kultura bakanıı.
Источник grt.md 04.04.2022