Geçän dinnenmek hem yortu günnerindä Gagauziya hızlı medik yardımı çaarıldı insannarlan 385 keret
Dinnenmek hem yortu günnerindä hızlı medik yardım izmeti işledi gecä – gündüz durmadan. Ekstra hem sıra dışı danışmalar yoktu. Bunu için haberledi Gagauziya hızlı medik yardımı departamenti.
Medik yardımını insana 15 brigada verdi. Dört günün içindä danışmaklara görä brigadalar çıktılar 385 çaarmaya. Var baalantı dolay merkez bolniţalarınan, da lääzımsaydı, hastaları orayı getirerlär, haberledi Gaguziyanın hızlı medik yardımı departamentin başı Vitaliy Dragoy.
“Danışmaların taa çoyu baalı kalp-damar hastalıklarınnan hem üüsek tansionnan. Bundan sora, insan üüsek temperaturaylan danışardı. Üçüncü erdä da pankreatit hem gepatit hastalıklaırı”, — açıkladı Vitaliy Dragoy.
Ne baalı koronaviruslan, Vitaliy Dragoy annattı, ani durum hep ölä kalȇr. Eer brigada bölä danışmaya gidärsäydi, hızlı test negativ çıkardı.
“Bunun için var nasıl sölemää, ani koronaviruslan baalı danışmalar yoktular”, — söledi Vitaliy Dragoy.
Vitaliy Dragoy haberledi, ani medik yardımı dinnenmek hem yortu günnerindä lääzım oldu diil sade Gagauziyanın yaşayannarına, ama avtonomiyada bir vakıda kalan Ukraina vatandaşlarına da.
“Birär — ikişär danışmak gündä olȇr. Lääzımsaydı bolniţaya getireriz, ama kimilär evdä kalȇrlar. Hepsi bilgileri aylä doktolarına vereriz, da onnar ilerlederlär ilaçlamaa cenktän kaçannarı”, — söledi hızlı medik yardımı departamentin başı.
Gagauziyada geniştän kutlanıldı milli yortu Hederlez. Baş olaylar geçti Çadırda at fermasında, nereyi çok insan toplandı. Nicä nışannadı Vitaliy Dragoy, yortu raat geçti. Orada vardı medik punktu.
“Lääzımsaydı, insanda vardı kolaylık danışmaa medik punktuna baş acımasınnan, güneş urmasınnan. Ama bizä hızlı medik yardım izmetinä danışmak yoktu. Hepsi raat geçti, kötü olaylara razgelmedilär”, — söledi Vitaliy Dragoy.
Hederlez ayın 9–da Enseyiş günündä hızlı medik yardım izmetinä ekstra danışmaklar yoktular.
Источник grt.md
