Gazın paasını bobaylan kızı annaştılar, parasını sa vatandaş ödeyecek
Cumaa günü, Canavar ayın 29-da, Sankt-Peterburgtan geldi haber, ani Rusiyaylan Moldova annaşmışlar, ani CAB “Gazprom” (oku: “boba”) hem AB “Moldovagaz” (oku: “bobanın kızı”) taa beş yıla uzatmaa Moldovaya rus gazının gelmesi için kontraktı.
Bildiriler, ani bu iş olmuş Cümne Akționer Bürlii (CAB) “Gazprom” Pravleniyasının Başı Aleksandr MİLLERlän yapılan annaşnalarlan, neredä aracılık işini yapmış Moldovanın vițe-premyer-ministrusu, infrastruktura hem regionnar ilerlemesi işlerindä ministrusu Andrey SPINU hem neredä pay almış AB “Moldovagaz” Pravleniyasının Başı Vadim ÇEBAN.
Sölener, ani bu iş yapılmış “karşılıklı yaralı koşullarda”. Bu gaz Moldovaya kaça satılacek hem kimä deyni bu iş yaralı – açıklanmada sölänmeer.
Ani o ucuz olmayacek artık belli. Ama kaça olacek? Moldovanın vițe-premyer-ministrusu, infrastruktura hem regionnar ilerlemesi işlerindä ministru Andrey SPINUnun aazından çıktı, ani gazın bin kubometrası 420 ABD doları gibi olacekmış. Ama vatandaşa o kaça satılacek bir Moldova Pravitelstvosu biler! Moldovadakı ekspertlar sayêrlar, ani gazın bir metra kubu için vatandaş 12 ley ödeyecek. Herliim bu ölä sa, esap gösterer, ani gazın bin kubometrası yapacek yaklaşık 690 ABD dolar.
Taa ötää bu kontrakı imzalayannar için ilgili bir açıklama: AB “Moldovagaz” – moldo-rus energeti kompaniyası, angısının akțiyalarını tutêrlar: CAB “Gazprom” (50%), Moldova Pravitelstvosunun Özelleştirmä hem devlet varlıında çorbaçılık Departamentı (35,33%), Pridnestrovye devlet varlıında çorbaçılık Komitetı (13,44%) hem kalan 1,23% ufak akținerlarda.
Nicä görersiniz AB “Moldovagaz” CAB “Gazprom”un kızı olan bir Akționer Birlii. Onuştan gazın paasını bobaylan kızı annaştılar, parasını sa vatandaş ödeyecek.
Источник anasozu.com
