Gaydarcı liţeyindä eni üürenmäk yılı başladı
Komrat munıţıpiyasının G. Gaydarcı adına liţeyindä yortu oluş Bilgi günä adalı geçti. Üüretim kurum donadılıydı balonnarlan,şen ötärdi muzıka. Yortu başladı hem geçti liţeyin önündä,neredä toplanmıştı üürenicilär,üüredicilär hem analar — bobalar.
G. Gaydarcı adına liţeyinä bu yıl ilk sıra birinci klasa 59 uşak gitti, 54 tä 10-cuya. « Kefimiz ii. Bizä deyni sentäbrinin biri- yortu. Bu yıl bizä diil nicä hepsi. 85 yıl geçti ,nicä liţey kuruldu. Bu yıldönümünä bir etiştik üüsek uurda çıkışlarlan», — söledi liţetyin direktoru Lüdmila Gorbunova.
LÜDMİLA GORBUNOVA G. Gaydarcı adına liţeyin direktoru : — «Bizim başarannar geçmiş üürenmäk yılın sessiyasında kablettilär 14 nota 10, 15 — dokuz nota hem 99 sekiz. Bütün liţeyin orta balı, yaraştırarak devletin liçeylerinnän, üüsek uurda . Bizim liţey 319 liţeyin arasından 45 erdä bulunȇr. bu en ii çıkış Gagauziyada ».
Uşakların üzündän belliydi,ani sevinerlär üürenmeyä geeri dönmää. Hertaraftan görünärdilär çiçek testeleri hem gözäl giimni üürenicilär.Yortuya ilkin teklif ettilär başlankı klaslara gidän uşakları. Uşaklar seftä adımadılar liţeyin eşiklerinä. Tezdä başlayacȇklar ilk uroklar,bulunacȇklar ilk dostlar hem ilk ev işi. Ama şindi sade sevinmelik ,ani üürenmäk yılı başlȇȇr.
— « Sevinerim,ani okula çekettim. İsteerim islä üürenmää.»
— « Bän üüsek notalara üürenecäm»
— «Savaşacam sade üüsek notaları kabletmää»
22 başaran kendi üüredicisinnän Elena Varbannan bitki üüretim yılını başlȇȇrlar. Üüredici belli etti daavaları hem neetleri ,angılarını lääzım olacȇk aslıya çıkarmaa.
ELENA VARBAN rumın dili üüredicisi : — « Çalışacıız bütün kuvetlän. Hepsi ev işlerini yapa bileciiz. Hergün üürenmeyä geleciiz. Bilerim ,ani üüsek notalar bizim oalcȇklar».
Başaranara deyni bu üüretim yılında bitki sıra ilk çan çekildi. Liţeyistlär sıcak akılına getirdilär 12 yılı ,angıları üüretim kurumunda geçtilär.
— «Lääzım büündän hazırlanmaa ekzamennerä. Bütün kuvedimizi lääzım kolayım,ki ii başarlarlan yılı bitirelim. 12 yıl hep savaştık başarmaa liţeyi üüsek uurda».
— « İsteerim yılı en ii başarmaa. Bana deyni önemli bu iş. Universitedä gitmää deyni üüsek nota lääzım».
— «Doluyum duyguylan. 12 burada üürendim. Bilerim,ani hepsi bekleer biz ekzamenneri verelim islä notalara. Biz utandırmayacıız kimseyi».
Adetça , yortunun bitkisindä hepsinä deyni ilk çan çekti. O gösterdi,ani üüretim yılı başlȇȇr.Hepsi üürenicilär daalıştılar kendi klaslarına,neredä ilk urok geçti. Komradın G. Gaydarcı adına liţeyindä ilk zanaatta nışannadılar,ani üüredicilär isteerlär,ki uşaklar büüsünnär haliz patriot hem korusunnar kendi ana dilini.İlk dersi üürenicilerä deyni cümnä aktivisti Mihail Vlah geçirdi.
MİHAİL VLAH cümnä aktivisti : — «Uşaklar diil lääzım unutsunnar ana dilini. Ayledä taa lääzım terbietsinnär patriotik duygularını. Çoyu bilmeer nicä kuruldu Gagauziya. Nesoy zorluklarlan karşı geldi aksakallar. Büün neetimiz onnara annatmaa».
Mihail Vlah annattı uşaklara nicä Gagauziya kuruldu. Akţent yapıldı gagauz dilin rolü için gagauz halkının istoriyasında, şindiki zamanda hem gelecektä. Gagauz dili üüredicisi Evgeniyä Marinova annattı uşaklara halkın istoriyası için,angıları koorundu şindiyadan avtonomiya kurulmasının hatırınnan. Kultura hem dil ayırılmaz.Onuştan da dili lääzım üürenelim,söleer Evgeniyä Vasilyevna, nışannayarak,ani hepsi koşullar üüretim kurumundä üürenmeyä deyni yapıldı.
EVGENİYÄ MARİNOVA gagauz dili üüredicisi G.Gaydarcı liţeyindä : -«Bitki vakıtlar gençlär hem analar-bobalar istämeerlär gagauz dilindä lafetmää. unudulȇr adetlerimiz.Onuştan da geldik karara bölä patriotik dersini geçirmää».
Evgeniyä Marinova umutlanȇȇr,ani üüredicilerin ,cümnä aktivistlerin, kuvet temsilcilerin kuvetleri yardım edecek durumu diiştirmää. Gelän zamanda gagauz dili olacȇk sorumnu gençlerin arasında.
Источник grt.md 02.09.2022