Gagauziyanın “Yılın üüredecisi” hem “Yılın terbiedicisi” belli oldular
Mardın 15-dä nışannadılar onnarı, kim kendi yaşamasını üüredicilik zanaatınnan baaladı. Onnarın sırasında vardı üüredicilär hem terbiedicilär.
Вu yıl zanaat yarışmasında 29 üüredici pay aldı: 12 üüredici hem 17 terbiedici.
Yarışmak üüredicilerä verer kolaylıı profesionnalıını zanaat uurunda açıklamaa, söledi Gagauziya Üüretim bakannıın başı Natalya Kristeva.
NATALYA KRİSTEVA, Üüretim bakannıın başı: «Yarışmada pay alan üüredicilär, cuvap ettilär önemli soruşlara: nesoy okul uşak başçası lääzım olsun, neçin büün bu kurumnar sorumnu».
İki ayın içindä yarışmanın pay alannarı açık dersleri verdilär, zanaat uurunda intervyu verdilär, videolarını zamandaş üüredici için yaptılar. Yarışmak üç nominaţiyada geçti: “yılın üüredicisi”, “yılın terbiedicisi” hem “yılın pedagogika debütü”. Siiredicilerin beendii üüredicisi baaşışı hem bakannıın maasuz baaşışı da belli edildi.
Üüredicilik zanaatını dooru seçmesindän hiç şüpelenmeer istoriya üüredicisi Valkaneş kasabasından Dmitriy Koliş.
DMİTRİY KOLİŞ, istoriya üüredicisi, Doljnenko adına liţey, k.Valkaneş: «En ilk, ne lääzım olsun bu zanaatta -o büük sevgi uşaklara, hem benim var havezim işlemää onnarlan, problemalarını annamaa, doorutmaa uşakları hayırlı yola, paylaşmaa onnarlan eni bilgilärlän. Üüredicilik yolu benim aylemdä bana da bezbelli malimdän hem bulümdan geçti».
Rumın dili terbiedicisi-üüredicisi Alöna Gaydarlı Çeşmä küüyündän ikinci eri «Yılın terbiedicisi-2022» nominaţiyasında aldı.
АLÖNA GAYDARLI, rumın dili terbiedicisi-üüredicisi, Çeşmäküüyü: «Hazırlanarkana kolegalarımın, dostlarımın, uşakların ana-bobaların yardımını duydum. Bunun için işlemää hem ondan beslenmää halizdän büük iştir».
«Уılın üüredicisi» nominaţiyasında ikinci erä çıktı rumın dili üüredicisi Komrattan Naira Dülger.
NAİRA DÜLGER, rumın dili hem literatura üüredicisi S.Kuroglo adına gimnaziyasında,m.Komrat: «Üüredicilik zanaatı zor. Hazırlanmakta lääzımnı oldu profesionallık hem zaamet. Ama bizim zanaatımız meraklı. Bunun için hepsi üüretim bakannıınnan geçirilän yarışmaklar meraklı hem bereketli».
Yılın üüredicisi-2022 yarışmanın tarayıcısı oldu Tatyana Dumbravan Çadır –Lungadan.
ТАТYANA DUMBRAVAN, «Yılın üüredicisi-2022» yarışmasının tarayıcısı: «Beklenilmäz bir tarayış, nicä da herbir taramak. Biz bütün kolektivlän kuvedimizi koyduk, ki üüsek uurda zanaat uzmannıını göstermää».
«Yılın üüredicisi-2022» hem «Yılın terbiedicisi-2022» regional yarışması 15-ci sıra geçiriler.
Источник grt.md
