Gagauziyanın üürenicilerini üürederlär korkunç olaylarda kendilerini dooru götürmää
Hederlez ayın 13-dän 14-dän iç işleri ministerliin hem üüretim ministerliin barabar kararlarına görä «Barabar riskleri iisilderiz» uşaklara deyni girginnik okulu geçirildi «Olimpieţ» lagerindä. Olayı Bakannıık komiteti, Gagauziya Hatalı olaylar bakannıı, üüretim bakannıı , gençlik hem sport bakannıı barabar hazırladılar.
«Barabar riskleri iisilderiz» girginnik okulu terbiedecek genç olannarda becermekleri çemrek çıkış bulmaa zor durumda, hatalı olayda hem ekstrimal oluşlarda. Bilgilär yardım edecek uslu hem faydalı ilk medik yardımını vermää lääzım olarsa.
«İlk sıra kişi düştüynän hatalı olaya, ister-istemez korktuynan var nicä ansızdan kötü bişey yapsın. Statistika gösterer, ani insan bilärkänä temel becermekleri, 50 % var nicä yardım versin», — açıkladı Gagauziyanın hatalı olaylar bakannıın başı Vitaliy Kassa.
120 liţeyci iki günün süresindä üüreneceklär nicä dooru medik yardımını vermää, yol kurallarını, nicä kendini götürmää hatalı olayda hem başka yaşamakta lääzımnı becermekleri. Hep ölä planda var hem sport, hem dä bilgi yarışmaklarını geçirmää.
«İslä olacȇydı te o bilgileri hem becermekleri yaşamanızda kullanasınız. Beki lääzım olacȇk dostunuza yardım», — danıştı gençlerä Gagauziya hatalı olaylar bakannıın haberlemäk bölümün başı Oleg Malışevskiy.
Gagauziyanın başı İrina Vlah selämlaştı liţeyin üürenicilerinnän hem üüredicilerinnän. O diledi, ki iki gün geçsin pek faydalı.
«Te neyä sizi iki günün süresindä üüredeceklär, sade fayda getirecek. Sorumnu bu işä lääzım katılasınız”, — söledi başkan.
Pay alannar » Barabar riskleri iisilderiz» girginnik okula Komrattan, Çadırdan, Başküüdän, Avdarmadan, Kıpçaktan üürenicilär geldilär. Herbir takım 12 pay alan temsil etti.
» İi bir oluş hazırlamışlar. Çok takım toplandı. Hepsi kim geldi, artık tarayıcı», — açıkladı fikirini Anar Kendigelän.
» Bölä oluşlar vererlär gençlerä faydalı bilgileri. Üürederlär, nicä hatalı olayda kendini götürmää», — paylaştı Anna Zlatovçena.
«En zordu balonu giimää. O aar, kostümnär büük», — açıkladı ilk zoorlukları için yarışmaklarda Marina Uzun.
Oluşun neeti — üüretim-terbietmäk hem sport. Onu hazırladılar genç olannara deyni, ki maasuz bilgileri vermää. «Barabar riskleri iisilderiz» girginnik okulu hazırlayacȇk evlatları dooru yaptıklara hatalı olayda, kaaviledecek uşakların saalıını hem güüdesini.
Источник grt.md
