Gagauziyanın üürenicileri yardım ederlär dikmää daaları
Eşilletmäk ayın içindä daa çorbacılıın uzmannarı Komrat hem Çadır dolaylarında barabar üürenicilärlän başladılar dikmää daaları. Moldovada sade 12 poroţent daa var. Uzmannarın bakışlarına görä bu sayı lääzım olsun taa zeedä, bakarak bizim kuru havaya.
Bir gündä Komratta, Başküüyüdä hem Aydarda daa çorbacılıın uzmannarı barabar uşaklarlan Gagauziyanın üç üürenmäk kurumnarından diktilär 6 ektar daa. Bir- iki yıldan sora fidancıklar büüyüp dönüşeceklär genç daaya.
Devlet koydu davaayı zeedeletmää daa plantaţıyalarını 15 proţenda gelecek yıllarda. Gagauziyanın daa çorbacılıın başı Aleksey Kulikov nışannadı, ani zaametçilerin hem uşakların birleşik işi verecek ii çıkışları.
“Bizim neetimiz terbietmää uşakları hem üüretmää onnarı korumaa hem sevmää daaları. Biz büün geçireriz akţiyayı deyni dikmää eni daaları hem koyȇrız fidancıkları, neredä tutulmadılar bu erdä Komratta”, — açıkladı Aleksey Kulikov.
Komrat kasabasının Dm. Karaçoban adına liţeyın üürenicileri nışannadılar, ani büük havezlän kablettilär teklifi yardım için hem umutlanȇrlar, ani insan taa becerikli olacek bu küçük fidancıklarlan.
“Devletin üülen tarafında aaz salkım, da dikeriz ki zeedeltmää bizim daalarımızı”.
“Bän var nicä söleyim, ani bu ii proekt, lääzım dikmää fidannarı hem taa ii olsun tabiatmız.”
“Büün geldik yardım etmää, kı genişletmää daaları”.
Üüredici Evdokiya Kiçuk urguladı, ani isteyenerin sayısı taa çoktu, ama durgutmamaa deyni üürenmeyi aldılar iki klasın üürenicilerini. O urguladı, ani uşaklar büük havezlän dikerlär aaçları.
“Bän sayȇrım , ani bu iş pek faydalı hem bu tema aktual, haliz bu vakıt, zerä fidannar kesilerlär, kalȇr aaz, bizdä kuraklık, aaz yaamur, da sayȇrım, ani bu fidancıklar yardım edeceklär diiştirmää klimatı”, — nışannadı üüredici.
Başküüyün Tuzlov adına okulun üürenicileri katıldılar akţiyaya da barabar Kongaz daa çorbacılıınnan hem ekologiya agenstvosunnan diktilär eni daayı gölün yanında. Eni daaya kararladılar koymaa “11 a” klasın adını.
“Büünkü günä devletin hem regionun ekosisteması diil ii halda, da lääzım dikmää fidancıkları, ki olsun taa pak soluk hem taa ilin solumaa”.
“Açan bu fidannar büüyeceklär, var nicä olacek gelmää, dinnenmää, şaşlık yapmaa, oturmaa gölgedä”, — söledilär üürenicilär.
Ekologiya agenstvosunun inspektoru Georgiy Radov nışannadı bu akţiyanın önemliini. O açıkladı, ani lääzım yıl-yıldan zeedeletmää bizim daaları 15 proţendä.
Gagauziyanın daa çorbacılıın başı Aleksey Kulikov inanȇr, ani uşaklar fidan dikmektän sora taa düşünmeli tabiyata olaceklar.
“Ondan sora, nicä üç liţeyın üürenicileri başaraceklar işi, onnar taa ii koruyaceklar bu daaları, kırmayaceklar, yakmayaceklar, buna biz umutlanȇrız”, — söledi Aleksey Kulikov.
Bu akţiya ilk oldu uşakların ona katılmasınnan. Ama ileri dooru da plannarda var ilerletmää onu Gagauziyanın başka kasabalarında hem küülerindä, ki katılsın taa çok üürenici hem yaşayannar.
Источник grt.md
