Gagauziyanın üüredicilerinä kompensaţiyalar için proekt geçmedi
Ministruların kabinedı kayıl olmadı kanon proektinnän, angısında Üüretim kodeksın kimi diyşilmeklär bakılı. Dokumendä görä avtonomiyanın merkez dolaylarını Moldovanın başka dolaylarınnan hem muniţipiyalarınnan bir uura getirmää ki genç üüredicilerä para yardımı ödensin.
Hükümetin oturuşunda teklif edildi zap etmää bu takım kanon proektini, soleyip, ani bütünnä Üüretim kodeksına diyşilmeklerini lääzım hazırlamaa. Bu takım kararlan kayıl olmadı Gagauz Eri bakannık komitetin başın yardımcısı Olesä Tanasoglo, angısı hep ölä bu oturuşta pay aldı. O urguladı ki Üüretim kodeksında var bölümnär, angıları biri birinä kaarşı giderlär. Bunun beterinä kimi genç uzmannarda, angıları avtonomiyanın üüretmäk kurumnarına çalışmaa gelerlär, yok hakları evin arendası için hem energetika koşulları için kompensaţiyaları kabletsinär.
OLESÄ TANASOGLO, Gagauz Eri Başkanın yardımcısı: «Kararda gösteriler, ani hepsi bu Üüretim kodeksın gelän diişilmeklerindä bakılacek. Ama kimi zorluklar büün var, dün dä vardı, saba da olaceklar, er biz bölä kararı kabledecez. O köstek koyer kodeksın birtürlü kullanılmasına türlü erlerdä».
Sölärkäna genç üüredicilerin hakları için, Olesä Tanasoglo çizgiledi, ani devlet teklifeder onnara yaşamak erin arendası için hem energetika koşulları için kompensaţiyaları, ama bu yardımnan Moldovanın diil hepsi üüredicileri var nasıl kullansınar. Olesä Tanasoglo teklif etti bu soruşu çıkarmaa povestkadan da gelän oturuşta onu baktırmaa.
OLESÄ TANASOGLO, Gagauz Eri Başkanın yardımcısı: «Üüredici, angısı sade başler bu bölümdä çalışmaa kimi erlerdä garantiyaları kableder, başka erdä kabletmer. Bununnan hepsi baalı, neet ki üüredicilär, angıları ceviz ayın 1-dä okula geleceklär, hep ölä garantiyaları kabletsinär. Bu zorluk hem Gagauziyada var, hem Moldovanın kimi dolaylarında da. O iş, ani biz bu soruşun bakılmasını soraya brakȇrız, getirecek üüredicilerin azalmasına».
Başbakan Natalya Gavriliţa üüretmäk ministerliin başına sınış verdi kısa vakıtta avtonomiyanın temsilcilerinnän buluşsun ki bu soruşu taa derindän bakmaa.
NATALYA GAVRİLİŢA, Moldova Başbakanı: «Da laflaşalım nesoy bizdä kararlar var baalı üüretmäk kodeksın diişilmeklerindä. Sizdä şindän sora proekt var. O baalı diil sade bu soruşlan, ama başkaylan da. Biz isteriz ceviz ayın 1-dän o şindän sora Parlamenttä olsun».
Bakmayarak buna başbakan Natalya Gavriliţa teklif etti kabletmää kararı kanon proektin zap edilmesi için.
Источник grt.md 26.07.2022