Gagauziyanın şannı izmetçisi adını kablettilär üzdän zeedä uzman türlü sferalarda
Komratta kutlanıldılar kendi izmetindä üüsek başarılara etişän uzmanarı.
Gagauziyanın şannı izmetçileri ödüllerini her yıl kablederlär Avtonomiyada türlü uurlarda çalışan uzmannar. Onnarın arasında çiftçilär, üüredicilär, jurnalistlär, mediţina, kultura hem sport izmetçileri. Gagauziyanın M.Maruneviç adına bilim – aaraştırma merkezin 2 uzmanı kablettilär M.Çakır adına ordenı.
“Saa olunuz, ani topladınız bizi büün bu salonda. Burada büün toplandılar Gagauziyanın en seçilmiş insannarı. Onnar kazandılar burada bulunmayi, ki onnarı bütün Gagauziya görsün. İi başarılar işimizdä, hepsi ne yapılȇr fayda getirsin halkımıza”, — danıştı şannı izmetçi adını kabledennerä BAM aaraştırıcısı Mariya Kopuşçu.
Sport uurunda üüsek başarlara etişmäk için hem uşaklarda sporta sevgiyi terbietmäk için M.Çakir adına ordenını kabletti Moldovanın şannı treneri Pötr Kuru.
“Pek sevinerim, ani benim zaametimi esaba aldılar. Bizim işimiz beki diil okadar belli, ama biz büüderiz saalıklı uşakları, halkımızın saalıı bizdän çekiler”, — söledi Pötr Kuru.
Üüsek ödülü bilim uurunda zaamet için kabletti KDU filologiya bilgileri doktoru İvanna Bankova.
“Bän kendi izmetimdä çalışacam ötää dooru da. Saa olsunnar, ani esaba aldılar benim işimi”, — söledi İvanna Bankova.
Yıl yıldan ödülleri kabledennerin sayısı diyişer, ama sade bir iş diişmedik kalȇr, ödüllär verilerlär en çalışkan, en başarılı uzmannara.
“Büün burada bulunȇrlar Gagauz halkının en başarılı hem en talantlı insannarı. Siz kendi hergünkü işinizi bütün ürektän yaptınız, istämeyeräk baaşış. Siz işinizlän örnek oldunuz. Saa olunuz sizä bu iş için. İnanȇrım, ani siz yapacenız bizim cümnemizi, dolayımızı, Vatanımızı taa islää”, — danıştı ödülleri kabledennerä Gagauziyanın Başkanı İrina Vlah.
Önemli urgulamaa, ani ödüllenmiş uzmannarın taa çoyu üüsek uurlara etiştilär yıllar boyunca çalışkannıınnan, göstereräk örnek herbirimizä.
Источник grt.md
