Gagauziyanın primariyaları var nicä katılsınnar küülerin hem kasabaların ilerlemesi için proektların yarışmasına
İnfrastruktura Ministerlii hem Gagauziyanın bölgeyi ilerlemäk Agenstvosu haberledilär, ani proekt yarışmasını çekettirerlär. O geçer «Evropalı küü» Millet programasının çerçevesindä. Proektlär finanslanacȇklar Millet dolay hem kasaba – küü ilerlemesi fondundan. İstekleri para kabletmää deyni var nicä vermää baba marta ayın 22-dän çiçek ayın 20-nädän.
Gagauziyanın primariyaları var nicä pay alsınnar proektlar yarışmasında ölä isteklärlän nicä su, kanalizaţıya, yaslaları, okulları, Kultura evleri düzülmesi için.Var nicä olsun proektlär erideki biznesın ilerlemesi için hem ȇnergiyanın koruması için.
«Biz isteriz nekadar taa çok erideki kuvetlär pay alsınnar yarışmakta hem tarasınnar proektleri. Ama diil lääzım unutmaa, ani bu yarışmak yapıldı ,ki en ii proektleri aslıya çıkarmaa. Teklif ederim pay alasınız», — danıştı primalara infrastruktura hem bölgeleri ilerlemäk ministerliin temsilcisi İgor Malay.
Bu yıl devletin hükümeti kabletti kanon proektini, angısında yazılı hepsi sorumnar erideki proektlärlän çalışmakta. Orada çizgilener, ani hepsi proektlär, angıları geliştirilerlär erideki uurda, 100% ödenerlär millet fondunnan, nışannadı Gagauziya bölgeyı ilerlemäk agenstvosunun başı Tatyana Donçeva.
«Hepsi onnar, kim pay alȇrlar proektlär yarışmasında, lääzım devlet temelindä olsunnar. Lääzım bilmää,ani proekt giriştirlendiynän dä, payalannarın statusunu olmaz olacek diiştirmää», — nışannadı Tatyana Donçeva.
10 mln leyadan verilecek o proektlerä, angıları doorudulu olacȇklar su hem kanalizaţıya sistemaların düzülmesinä, 5 million leya kadar verilecek proektlerä, ani baktırȇrlar ȇnergiyayı yapan sistemaların koyulmasını, küülerdä önemli arhitektura yapıların düzülmesinä, angıları eveldän kalma, hem var istoriya paalılıı, başçalara, parklara, kultura hem natura landşaftlarına. 3 million leya kadar gidecek şafk sistemasının geçirilmesinä, 1 million ley — kasabanın genel planını kurmaa deyni.
«Bu yarışmanın baş neeti — soţial-ȇkonomika baalantılarını kaaviletmää. Yardım edecek ilerletmää küüleri. Yaşayannara verilecek kaliteli devlet izmeti», — açıkladı Gagauziya bölgeyı ilerlemäk agenstvosunun plan yapan bölümün başı Svetlana Gradinar.
Seminarların geçirilmesi erideki kuvetlerin temsilcilerinä deyni haberlenecek bölgeyi ilerlemäk agenstvosunun internet sayfasında ozaman, açan çekedecek yarışmak.
Источник grt.md
