Gagauziyanın hepsi üüretim kurumnarın bitirennerin balosu geçti Komradın meydanında
Biyaz balonnar hem Biyaz avşam. Bu yıl liţeyleri başarannarın avşamına toplandılar Gagauziyanın üürenmäk kurumnarının 500 — zä yakın başaranı.
2022-cı yılın başarannarın arasında bulundular Gagauziyanın 19 liţeyin, 2 kolecin, 3 profesional uçilişçesinin hem KDU üürenicileri. Gözäl, akıllı hem gelecektä eni işleri gerçeklemeyä hazır üürenicilär, yortunun baş kahramannarı oldular.
“Bän pek bekledim bu günü. Bän bileerim nereyi bän gidecäm, isteerim olmaa profesor hem sanȇȇrım, ani Allah bana yardım edecek”.
“Bän pek mutluyum büünkü gündä hem biraz darsıma içindä var ani bitirerim 12-ci klası hem geldim bir yolun da düşünerim, ani ileeri dooru hepsi islää olacek”.
“Bän hiç pişman olmȇȇrım, ani bän başardım liţeyi hem çok mutluyum bu gün. Bän doktor olmaa isteerim uşakları ilaçlamaa isteerim. Üürenecam Kişinövda”.
“İleri istäärdim taa hızlı başarmaa, ama büün bira gücenikim. İsteerim yüriik fakultetinä üürenmää gitmää”.
“Şkola başarıldı, bunda bişey korkunç yok. İsteerim psiholog olmaa. İsteerim kalmaa Moldovada”.
Açılayarak umudunu, ani büünkü başarannar birkaç yıldan sora döneceklär Gagauziyaya üüsek uurda uzmannar gibi, herbirini kutladılar gagauziyanın Bakannık Komitetin hem Halk Topluşun temsilcılerı.
“Bän bileerim, ani siz bizdän taa islääsınız. Bän inanȇrım, ani siz yapaceenız taa gözäl bir dünnää. Sizin yaşamanızda başarılȇr bir pay hem başlȇȇr eni bir pay, angısında sizin bilgileriniz yardım edeceklär ileeri gitmää”, — söledi Gagauziyanın başkanı İrina Vlah.
“Sizin aranızda var öleleri, angıları aşırıda üüreneceklär. Ama tutunuz aklınızda, ani siz Gagauziyadansınız. İlerlediniz bu adı. İnanȇrım, ani siz döneceeniz geeri üüsek uurda uzman olarak”, — söledi GHT başı Dmitriy Konstantinov.
“Bän bakȇrım sizä, da annȇȇrım, ani siz bilersiniz nereryi gitmää, siz annȇȇrsınız ne lääzım sizä bu yaşamaktan. Siz pek akıllıysınız, siz arifsiniz. Bän bileerim, ani siz diyştireciniz bu dünneyi ii tarafa”, — söledi Gagauziyanın Üüretim baş bakannıın başı Natalya Kristeva.
Gagauziyanın üürenmäk kurumnarını bu yıl başardılar 490 üürenici. Çoyu onnardan plannȇȇrlar katılmaa Gagauziyaylan MD Tehnik Universitetindä üürenmesi için verilän programasına.
“Bu eni bir adım. Bän isteerim MD Tehnik universitetindä üürenmää. Burada islää bir destek programası var. O yardım edecek bizä ayaa kalkmaa”.
“Bän şansora girdim MD Tehnik universitetinä. Sayȇrım, ani bölä programalar lääzım olsunnar. Umutlanȇrım ani çoyu isteyeceklär katılmaa buprogramaya”.
Bu yıl avşamı simbolik adı oldu “Biyaz Avşam”. O nışannȇȇr birlii, usluluu, açık yolu hem eni bşarıların çeketmesini.
“Hem sevinmelik var hem biraz zor, ani gierlär bizdän. Dileerim onnara bulsunnar kendi yollunu da kaldırsınnar Gagauziyayı hem Moldovayı üüsek uura”, — söledi Kıpçak küüyünün B.Yanokoglo adına liţeyin öndercisi Olga Hadjioglo.
Avşamın sonunda başarannar oynadılar kendi son valsını hem kolverdilär göklerä biyaz balonnarı. Onnara gösterildi maasuz kanţert programası.
Источник grt.md
