Gagauziyanın Baş Kanonuna diişilmekleri hazırlayan komissiyada açıkladılar, ne uurda gider iş
Gagauziyanın Baş Kanonuna diişilmekleri hazırlayan Halk Topluşu deputatlar komisayası başladı işlemää. Bu proţesä katıldılar kanon kurucuları hem ekspertlär. Angı diişilmekleri onnar neetlenerlär yapmaa, materialımızda.
Halk Topluşun komisiyası üürendi teklifleri, ne lääzım Gagauziyanın Baş Kanonunda diiştirmää. Bundan sora onnar açıkladılar baş soruşları, angılarından başlayacek onnarın işi.
“Soruşlar, angıları baalı Başkan seçimnerinnän. Ki bulmaa formulayı hem azaltmaa seçicilerin sayı sınırını, bakarak avtonomiada migraţiya proţeslerinä. Soruşlar, angıları baalı Halk Topluşun işinnän, onun başın ayırımasınnan. Biz belli edecez vakıdı, angısının süresindä deputatlar lääzım olacek bunu yapsınnar. Onnar bunu yapmaarsaydılar, Başkanın kararınnan Halk topluşu çözüleçek dä yapılacek eni seçimnär. Erlim Halk topluşu uzun vakıt kanonnarı kabletmäärsä, ozaman da Başkan var nicä bunuu yapsın”, — açıkladı komissiyanın başı Georgiy Leyçu.
Komisiyanın oturuşunda belli edildi , ani diişilmeklär lääzım baalı olsun finans hem ekonomika uurlarınnan da. Bundan çekiler insannarın yaşamasının uuru.
Deputat komisiyasının işinä katıldılar ekspertlär, angılarında var bilgilär hem geçmiştä bu uurda yapılmış iş.
“GHT ilk spikerı Pötr Paşalı, Vitaliy Kürkçu, Georgiy Sult hem başkaları. Bakannık komitetin azaları gelmedilär oturuşa. Deputatlardan kaare başka pay alannar ekspert uurunda var nicä katılsınnar”, — sçledi Georgiy Leyçu.
Deputatlar hem ekspertlär geldilär karara, ani lääzım kabletmää reglamenti komisiyanın baş neetleri işin hem haberlemää bunun için cümneyi.
Deputatların komisiyasının başı Georgiy Leyçu, onun yardımcısı İvan Dimitroglo, sekretar Aleksandr Dülger.
“Komisiya bütün kuvedä işleer. Şindän sora var tekliflär. Biz primarlarlan işleeriz hem başka insannarlan. Bän danışȇrım hepsi insannara, ko aktiv katılsınnar bu işä hem yardım etsinnär, kendi tekliflerini açıklasınnar. Biz onnarı bakacez. Olarsaydılar aktual, kabledecez”, — söledi komisiyanın başı.
GHT saytında açıldı maasuz bölüm “Gagauziya Baş kanonu”, angısında insannar var nicä tanışsınnar hepsi önemli dokumentlärlän hem komisiyanın işinnän. Kendi işletmelerini dä Baş Kanonuna var nicä yollasınnar ulojenie@gmail.com maylına.
Gagauziyanın Baş kanonu – Ulojenie 1998 yılda kabledildi Halk Topluşunnan.
Источник grt.md 12.04.2022