Gagauziyadan gençlär tanıştılar Alexandru cel Bun asker akademiyasında üürenmäk koşullarınnan
«Alexandru cel Bun» asker akademiyası «Açık kapular günü» oluşunu geçirdi. Baş neetti meraklandırmaa gençleri bu üüretim kurumunda üürenmesinnän. Musaafirlerä gösterdilär kazarmaları, üürenmäk bölümnerini, bibliotekayı hem imäk zalasını. Şindiki zaman asker akademiyasında Gagauziyadan 4 kursant üürener.
«Alexandru cel Bun» asker akademiyası her yıl teklif etmää deyni eni studentleri «Açık kapular günü» geçirer. Bu gün geçer maasuz te o genç olannara deyni, agıları isteer bu üüretim kurumunda üürenmää. Oluşta bütün Moldovadan büük klasların üürenicileri pay aldılar.
«Te o üürenicilär, angıları geldi, kendileri var nicä üüretim kurumunna tanışsınnar, klasları, imäk zalasını görsünnär. Gençlär görerlär, angı koşullarda studentlär yaşȇrlar», — söledi Anatoliy Bukuç, polkovnik, «Alexandru cel Bun» asker akademiyasının rektoru.
«Alexandru cel Bun» asker akademiyasını Dezgincä küüyün yaşayanı Nadejda Dimitroviç 3 yıl geeri başardı. Büün o hodulluklan izmet eder vatanına şannı bekçi rotasında.
«Asker akademiyası terbiettii beni. Yardım etti bana asker bölümündä ilerlemää», — Nadejda Dimitroviç.
«Alexandru cel Bun» asker akademiyasının informatika hem asker baalantıları kafedrasında yakın 80 genç olan üürener. 25% onnarın arasında kızlar.
«Bizim kafedra üüreder İT tehnologiyaların temelinä görä kompyüterleri, radioları, dronnarı kullanmaa», — açıkladı Andrey Medvedeţkiy, informatika hem asker baalantıları kafedrasının başı.
Oluşta 300-zä yakın genç olan hem kız pay aldı. Onnar istedilär üüretim kurumun sıradakı gününnän tanışmaa. Onnarın aarasında askerä hazırlayannnar hem Gagauziyanın liţey başarannarı vardı.
«Gagauziyanın üüretim bakannıın hem erli asker merkezin yardımınnan getirdik abiturientları tanıştırmaa akademiyalan. İsteeriz ki olsun onnarda da kolaylık Moldovanın tek akademiyasına üürenmää girsinnär. Görsünnär nicä kursantlar yaşȇȇrlar, öndercilerin hem studentlerin ilişkilerini», — açıkladı Grigoriy Kaypak, Gagauziyada askerlää alan bölümün başı.
«Büün gördüm nicä üürenicilär yaşȇȇrlar, nesoy koşullar onnara deyni yapılı, ne onnar iyerlär. Beendim akademiyayı. Düşünerim gelmää akademiyaya üürenmää»,- paylaştı Daniil Mavrodi, G. Gaydarcı adına liçeyin üürenicisi.
Musafirlerä hazırlanmış sergidä temsil ettilär milli armatanın silahlıını: Kalaşnikov tüfeeni, snayper tüfeeni, makinalı tüfeklerini, amerikanın asker maşınaların modellerini.
«Hepsini burada beendim. Herersi gözäl. Düşünerim akademiyaya gelmää üürenmää», — paylaştı Dina Mitioglo, N. Tretyakov adına liţeyin üürenicisi.
«Pek gözäl akademiya. Bölä bişey ilerdän görmediydim», — Marina Tukan, Tretyakov adına liţeyin üürenicisi.
Oluşun süresindä kursantlar — askerlär gösterdilär nicä güreşerlär, becermeklerini tehnikayı kullanmaa, silahları hem baalantı tedarlıklarını.
Источник grt.md
