Gagauziyadan genç sambo güreşçileri Moldova çempionnarı oldular
Kirez ayın 30-dan orak ayın 2-dän Kauşanı kasabasında geçti Moldova uniorların hem gençlerin aralarında sambo çempionatı. Gagauziyayı tanıttılar sportçular Komrattan, Çeşmäküüdän hem Kazayaktan. Sambocular getirdilär regionun kumbarasına beş altın ödül.
Devletin uniorların hem gençlerin aralarında sambo çempionatında Pötr Kurunun terbiedilenneri kazandılar üç altın ödül. Devletin çempionnarı oldular Komrat komandanın liderları, angıları diil bir yıl kazanȇrlar bu titulu. İki altın kazandı Darya Vlah , angısı geçirdi hepsi güreşleri üüsek uurda brakmayıp konkurentlara şansları taramaa. Aleksandr Nedu hep ölä oldu devletin çempionu. Geçirip kızgın güreşleri, braktı geerdä kendi konkurentlarını da türlü çalımnarı yapıp kalktı pyedistalın üüsek basamaana. Trenerın Pötr Kurunun laflarına görä uşaklar yaptılar hepsi koyulmuş davaaları.
Nicä nışannadı Darya Vlah, yarışmaklar geçtilär pek üüsek uurda, zerä yufka konkurent yoktu, toplandılar devletin en kaavi sportçuları. O koydu bütün kuvedini da oldu ilk.
Kalan çocuklar seftä bölä yarışmaklardapay aldılar, onun için kazandılar 5-6 erleri. Trenerın laflarına görä pay almak verdi çok becermek onnara.
Kazayaa hem Çeşmäküünü tanıttı edi sportçu. Mihayıl Berberın terbiedileni Larisa Reşilän kazandı 80 kilalık kategoriyada ilk eri. Pötr Uzunun sportçuları getirdilär kumbaraya bir altın ödül hem bronza. Valentin Çelengir 49 kilada kazandı ilk eri. Pavel Kuyujuklu oldu üçüncü.
Nicä naşannadılar trenerlar, bütündän uşaklar pay aldılar yarışmaklarda üüsek uurda da gösterdilär, ani Gagauziyada sambo durȇr üüsek uurda.
Devletin çempionnarı girdilär Moldovanın toplumuna da gideceklär bu yıl Evropa hem Dünnä çempionatlarına.
Источник grt.md
