Gagauziyada üzlärlän ektar kır hem daa yandı kuru otların yakmasının beterinä
Kuru otların yakması getirdi büük yangınnara Gagauziyanın tolokalarında hem daalarında. Geçan dinnenmäk günnerindä Dezginja küüyündä yakın 100 ektar daa hem toloka yandı. Ama Çok — Maydan küüyündä bir aftanın içindä yandı yakın 130 ektar toloka.
Dezinja küüyün türlü taraflarında cumertesi hem pazar günnerindä birkaç yangın oldu. Bunu için haberledi primar Vasiliy Kapsamun. O nışannadı, ani kurtarcılar hem ateş sündürücüleri çemrek işledilär da vakıtçasına ateşleri sündürdülär.
“Sündürärdik barabar brigadalarlan Leovodan, Komrattan, Yargaradan, Dezginja küüyündän. Yandı yakın 100 ektar, biraz daa, biraz da toloka erleri”, — açıkladı Dezinja küüyün primarı.
20 ektardan zeedä siirek ot yandı Bucak küüyündä bulunan devlet tarafından korunan kırda. Primar Nikolay Dudoglo haberledi, ani yangının sebepleri diil belli.
“Bu devletin erleri, da burada 130 ektarda türlü otlar büüyerlär, angıları Kırmızı kiyada yazılı. Yangınnar bir erdä birkaç keret oldular. Biz insannan işleeriz, haberleriz ki ateşleri yakmasınnar. Kurtarcıların yardımınnan ateşleri vakıtçasına sündürdülär.
Dinnenmäk günnerindä da Bucakta sazlar tutuştuydu. Sebep hep diil belli, ekledi Nikolay Dudoglo.
Çok — Maydan küüyündä yandı 130 ektar toloka hem iki ektar insanın payları, annattı primariyanın uzmanı Anatoliy Zadır.
“Ateş yaklaştı insanın evlerinä. Yapıldı hepsi işlär ki ateşi vakıtçasına sündürmää. İki günün içindä yandı 57 ektardaa hem 100 ektar toloka. Bütündän yandı 130 ektar toloka, — açıkladı Anatoliy Zadır.
Anatoliy Zadır nışannadı, ani yangınnarın sebepi — tutuşturmak. Belli oldular kabaatlılar da, angıları insanın meralarını tutuşturdular primariyanın uzmanı.
“Ama ne baalı tolokalarlan, kabaatlı bulȇrlar çobannarı. İnsan gezer kırlarda da tutuşturer kuru otu, da giderlär, ateşi brakȇrlar yanarak. Lüzgär kaavileşer, da ateş taa ateş büüyer hem tez yayılȇr”, — söledi Çok – Maydan primariyanın uzmanı.
Gagauziyanın hatalı olaylarda bakannıın haberlerinä görä, bir aftanın içindä kurtarcılar 75 keret çıktılar ateş sündürmelerinä, açan kuru otlar yanardılar. Bakanıın uzmanı Dmitriy Konstantinov haberledi, ani ateş yaktı 300-zä yakın ektar toprak.
“Kurtarcılar çıktılar taa 9 yangına, angılar razgeldilär Çok-Maydan, Komrat, Çadır, Joltay, Etuliya, Avdarma, Bucak hem Beşalma küülerindä. Zararın sayısı belli ediler. Kimsey zararlanamadı. Önceki bilgilerä görä yangınnarın sebepleri — ateşin diil dooru kullanması, evlerin aullarında kuru yaprakların hem otların yakması”, — haberledi Gagauziyanın hatalı olaylarda bakannıın uzmanı.
Hem kurtarcılar, hem primarlar danışerlär insannara yakmasınnar gübürleri, kuru yaprakları hem otları.
“Biz diil bir keret danıştık hem danışerız insana tutuşturmasınnar otları. Neçin ki bu yangınnar getirerlär zarar tabiyata, insannarın saalıına, hayvannara”, — nışannadı bakannıın uzmanı.
Onnar, kim kanona karşı yaker kuru otları hem yaprakları, paraylan cezalanȇrlar. İnsannara 4,5 bin ley ceza bakılı, kurumnara da 15 bin leyadan.
Источник grt.md
