Gagauziyada muzika okulların festivali geçti
Muzika instrumentleri çalmaa becermeklerini avtonomiyanın dört okulun üürenicileri Komrat Kultura evin sţenasında gösterdilär.
Festivalda, angısını Gagauziyanın kultura bakannıı hazırladı, Komrat, Çadır-Lunga, Valkaneş hem Çeşmäküü muzika okulların üürenicileri pay aldılar. Okullar hazırladılar konţert programalarını, gösterip, nekadar islää muzika instrumentlerini çalmaa uşaklar becererlär.
MARİNA SEMÖNOVA Gagauziya kultura bakannıın başı: «Bizim muzika okullarımız – er, neredä talantları büüderlär. Bän pek sevinerim, ani onnarın sayısı yıl — yıldan zeedelener».
Komrat muzika okulundan festivalda yaratmalarını çaldılar hor, ansambli hem orkestr.
DMİTRİY TİMOFEY Komrat uşak muzika okulun başı: «Butakım festivallerdä bilgilärlän paylaşȇrlar. Uşaklara da bu pek önemli, hepsi aklılarında kalȇr. Bundan kaarä lääzım bilsinnär, ani başka kasabalarda hem küülerdä dä uşaklar muzikaylan zanaatlanȇrlar».
Çeşmäküü muzika okulu en küçük avtonomiyada. Orada uşaklar 3 instrumenti çalmaa üürenerlär. Natalya Levandovskaya sayȇr, ani kabledilmiş bilgilär pek faydalı uşaklara deyni.
NATALYA LEVANDOVSKAYA Çeşmäküü muzika okulun başı: «Bizdä var akordeon, fortepiano hem bu yıldan gitara. Bizim uşaklarımıza deyni meraklı işitmää nesoy öter başka nstrumentlär da, nay, taraf, orkestr, angıları Komrat, Çadır, Valkaneş okullarında var».
Çadır – Lunga muzika okulu 1959 yıldan çalışȇr. Büünkü gün orada 159 üürenici var. Filialları Kıpçak, Kazayak hem Tomay küülerindä var. Bu yıl festivali uşaklar pek beklärdilär, urguladı okulun öndercisi.
LİLİYA MAŞOGLO Çadır-Lunga muzika okulun başı: «Bizdä uşaklar fortepiano, akordeon, orkestr instrumentlerini çalȇrlar. Bu yıl ilk klasa üürenicileri kablettik onarı gagauz instrumentlerini çalmaa üüretmää deyni — nayda, gadulka. Umutlanȇrız, ani ileri dä satın alacȇz başka eni instrumentleri neetlän ilerletmää gagauz kulturasını».
Festivalin pay alannarı paylaştılar, ani sevinerlär büük sţenaya genä çıktılar. Bitki yıllar pandemiyanın beterinä çoyu konţertlar onlayn formatında geçärdilär, da uşaklar duyamardılar konţerdın atmosferasını.
Konţert bana deyni büük yortulu olay, neredä var nasıl bol duymaa kendini da oynamaa nicä duyȇrsın».
«Bän fortepiano çalȇrım. Severim, neçin zerä türlü kasabalara gideriz, konţertlarda pay alȇrız».
«Ona nay deniler. Sevdim onu neçin ki onun sesi gözäl, benzederim onun sesini tabiatın sesinä, bu ses bana cana yakın».
Bıldır festival onlayn formatında geçti. İki yıl geeri Valkaneş kasabısında yapıldıydı.
Источник grt.md
