Gagauziyada liţey klaslarına dokumentleri kablederlär
Avtonomiyanın liţeyleri orak ayın 11-dän 9 klasların başarannarından dokumentleri kablederlär. Angı kurallara görä bu proţes geçer, Gagauziyanın üüretim bakannın başın yardımcısı Nadejda Gaydarji annattı. Derindän süjedımızda.
Ekzamennerin verilmesi gimnaziya kursu için bu sade ilk adımnar büüklerin yaşamasına girärkän, var çok başka da. Çoyu başarannar liţey klaslarına kararlȇr dokumentlerini vermää ki 12 klastan sora bakalavr statusunu kabletmää, angısınnan var kolaylık universitetlerdä üürenmää. Butakım kolaylıı Gagauziyanın 20-dän zeedä liţey verer. Bu yıl, nışannadı avtonomiyanın üüretim bakannıın başın yardımcısı Nadejda Gaydarji, dokumenlerin verilmesi liţey klaslarında üürenmää deyni hep ölä nicä bıldır.
NADEJDA GAYDARJİ, Gagauziyanın üüretim bakannıın başın yardımcısı: «Kandidatlarda yanında lääzım olsun bu takım dokumentlär: ayırılmış profilä yzılı danışmak, gimnaziyanın başarılması için dokument, pasportun kopiyası, ya üürenci 16 yaşını tamannamadıysa lääzım duuması için dokumentin kopiyasını getirsin, 4 patret 3×4 hem varsaydı diplomnarın kopiyaları, ani o türlü olimpiadalarda, yaraşmaklarda pay aldı. Hepsi bu her zaman bakılȇr».
Liţey klaslarına üürenmää gidärkäna, başarannar real hem gumanitar profillerin aralarından ayırȇrlar. Taa sık metodologiyaya görä liţeylerdä ikişär klas kurulȇr. Bıldır Gagauziyanın 2 üüretim kurumunda 3 klas toplanıldı neçin ki pek çok isteyän dokumentlerini verdi. Ama vardı ölä kurumnar da, angıları hiç bir dä liţey klasını açmadılar.
NADEJDA GAYDARJİ, Gagauziyanın üüretim bakannıın başın yardımcısı: «Var ölä dä liţeylär, nicä gösterer bıldırkı yıllar, neredä üüretim bakannın komisiyası, liţeyin danışmasına görä, kararlȇr sade birär liţey klasını açmaa. Bakılȇr geçän yılların çıkışlarına, didaktika uurunda kadralarına, üürenicilerin olimpiadalarda payalmasına hem başarlara, gimnaziya uurunda ekzamennerin çıkışlarına. Er biz göreriz, ani liţey bu uurlarda başarlı, ozaman vereriz bölä kararı».
Dokumentlerin kabledilmesi iki etaptan kurulu. İlk orak ayın 11- 29 uzanȇr. İkinci tur lääzım analara-bobalara hem üürenicilerä, kim etiştirmedi bunu yapmaa hem klaslarda üürenicilerin sayısını zedeletmää. Karar kimi kabletmää üürenmää liţey klasında, yaraşmak orta balına görä kablediler. Vardı ölä olaylar, açan üürenici başardı 9-cu klası bir liţeydä, ama bala görä yaraşmayi geçmedi da kalamadı bu liţeydä ileri dooru üürenmää.
NADEJDA GAYDARJİ, Gagauziyanın üüretim bakannıın başın yardımcısı: «Burada genä profilä görä bakılȇr. Er bu real profil, ozaman matematika, biologiya, himiya hem informatika predmetlerin notaları bakılȇr. Gumanitar profilindä dillerdä notaları bakılȇr. Onnara taa rumın hem genel istoriyası katılȇr. Bizdä var taa sportiv liţeyi dä. O da pek sorumnu uşakların aralarında. Orada sa kabletmäk özeli baalı sportiv uurunda başarlarlan».
Gagauziyanın üüretim bakannıın temsilcisi urguladı, ani liţey klaslarına düşmää deyni lääzım hem ii üürenmää gimnaziya uurunda, hem hızlı dokumentleri da vermää. Bu baalı onunnan, ani avtonomiyanın birkaç liţeyi taa sorumnu nekadar öbürlär başarannarın aralarında. Bu üzerä bu kurumnarda liţey klasları en ilk dolȇr.
Lääzım nışannamaa, ani dokumentlerin kabletmesinin ilk payı şindän sora orak ayın 29 başarlanȇr. İkinci payı harman ayın 8-16-dan uzayacek.
Источник grt.md 01.08.2022