Gagauziyada ilk keret geçti masa tenisı Moldova Çempionatı
Gagauziyada seftä masa tenisı Moldova çempionatı geçti. “En ii tenis oyuncusu” adı için respublikanın sportsmenneri güreştilär. Yarışmalar Avdarma küüyündä kapalı tenis meydanında geçtilär.
Masa tenisı Moldova Çempionatı seftä Avdarmada geçti. Onda pay aldılar 120 veteran 8 boy kategoriyasından.
«Büün, açan devletimiz geçer soţial hem ȇkonomika krizislarından da cümnedä agresiya uuru kalkȇr, sportta birleştilär devletimizin hepsi bölgeleri: Belţı, Kaul, Tiraspol, Kişinöv, Komrat, Ungenı, Briçänı, Edineţ, Kalaraş, Valkaneş, Benderı. Şükür ederim sizi bu gözäl örnek için, sporta sevginiz için, dostluunuz için, hem biri – birinä yardım için. Bu haliz o örneklär hem insannık kaliteleri, angıları çoyu politikacılarımızda yok», — söledi Gagauziya başkanı İrina Vlah.
«Pek sevinerim, ani payalannarın arasında çok profesional tenis oyuncusu var. Bu gösterer, ani masa tenisı hiç yaşlanmȇȇr. Burada herzaman becerikli sportsmennär, angıları göstererlär sevgisini sporta oyunamalarınnan”, — söledi Gagauziya gençlik hem sport bakanı Sergey Stoyanoglo.
Sportsmennär eni becermekleri edindilär, çünkü çempionatta hem professionallar hem tenisı sevennär oynadılar.
«Bän tenis oynerım şansora 10 yıl. Katılȇrım türlü yarışmalara Gagauziya uurunda, şindi da istedim pay almaa respublika uurunda çempionatta», — annattı masa tenisı Moldova çempionatın payalanı İlya Stamat.
Avdarma klubun trenerı Nikolay Melintiy çempionatta beş keret taradı, bir keret tä tarattı, kazanıp 2-ci eri.
«Kendi tarafımdan örnek vereräk bän isterim üürenicilerimä göstermää, ani lääzım katılmaa yarışmalara herbir yaşta. Bän 40 yaşındayım. Bu ilk hem en genç kategoriya, ama bän şansora veteran», — söledi Nikolay Melintiy.
Tenisist Dmitriy Baeş Moldova Çempionatında seftä pay alȇr. Dmitriy vamada işleer, sport onun her günkü yaşamasını doldurȇr, paylaştı o. Çempionata Dmitriy eni bilgileri edinmää geldi.
«Bän başka da sport çeşitlerinnän zanaatlanȇrım, futbol oynȇrım. Ama tenis benim hobbim taa küçüklüümdän. Çempionata katıldım deyni başka payalannarnan tanışmaa, oynamaa», — paylaştı Dmitriy Baeş.
Tenis oynarkana güüdenin hepsi kas grupaları işleer, ne sportçuyu yapȇr taa kuvetli, onuştan tenis lääzım üüredilsin Moldovanın hepsi dolaylarında, sayȇr Moldova masa tenisı federaţiyasının başkanı İvan Sarandi.
«Hepsi uşaklar katılȇrlar yarışmalara, bukadar büüdü yarışma ruhu uşaklarda. Onuştan uşaklarımız büüdüynän bu sport soyunu ilerledeceklär», — söledi İvan Sarandi.
Gagauziyada masa tenisi edi uşak sport okulunda üüredilider, Avdarma küüyündä var tenis klubu. Bu sport soyunnan avtonomiyada büün 250 uşak zanaatlanȇr.
Источник grt.md
