Gagauziya sportçuların triumfu Moldova el düüşü çempionatında: 11 ödül angılarından 7 altın
Kişinöv kasabasında geçti devlet el düüşü çempionatı. O topladı iki matta devletin en kaavi düüşçüleri. Gagauziyayı tanıttılar Komrat LİON klubun trenerın Eduard Kösenin terbiedilenneri. 12 sportçu kazandı 7 altın hem ikişär gümüş hem bronza ödüllerini, kazanıp komandaların aralarında ikinci eri.
Nicä söleerlär, nekadar insan yaşȇȇr, okadar da nesä eni üürener. Trenerın Eduard Kösenin terbiedilenneri Lion klubundan her keret pay alȇrlar yarışmaklarda muay tay hem kikboksing yarışmaklarında, ama bitki vakıtlar çekettilär kendilerini denemää başka sport çeşitlerindä dä. İkinci keret pay alȇrlar düüş çempionatında. Çocukların çoyu taradılar kendi karışıtlarını buumak hem başka çalımnarlan, brakmayıp şans kimisinä kazanamaa puannarı. Uşakların laflarına görä, üç aftanın içindä onnar üürendilär eni becermekleri da trenerın beklentileri çıktı aslıya. Güreşçilär getirdilär klubun hem regionun kumbarasına eni ödülleri.
“Bän sayȇrım, ani yarışmaklar bana deyni geçtilär ii, ama var taa neyä üürenmää. Bän geçirdim iki düüş. Birini bän taradım yarım finala çıkmaa deyni. İkinciyi finala çıkmaa deyni tarattım. Bana etişmedi bir puan. Bän tarattım sayıylan 16-17”, — açıkladı Devlet çempionatın bronza ödülcüsü Andrey Sarandi.
“Bana deyni yarışmaklar geçtilär ii. Bän geçirdim iki düüş da ikisinidä taradım. Zordu, ilk düüşü bän taradım buumak çalımınnan, ikinciyi puannara görä”, — annattı Moldova çempionu Aleks Fayu.
“Bän ilk keret bölä yarışmaklardayım, onnar geçtılär ii. Bän geçirdim iki düüş. Birini taradım buumak çalımınnan, ikinciyi başardım pek hızlı. İlkinkidä konkurent pek kaaviydi, taradım onu 1,5 minutta. İkinci taa yufkaydı”, — söledi Moldova çempionu Sergey Tukan.
“Yarışmaklar geçtilär ii, bän ikinci yıl pay alȇrım yarışmaklarda da kazandım ilk eri. Bendä bir konkurent vardı”, — annattı çempionka Liya Serbinova.
Taramak kolay olmȇȇr, da buna getirer çok saatlık sınışlar zalda hem becerikli trener, angısı doorudȇr hem üüreder götürmää düüşü dä sakatlanmamaa. El düüşü getirer yaralara hem sakatlanmaa var nicä. Onun için, nicä nışannadı trener, onun daavası diil sade yardım etmää uşaklara kazanmaa puannarı, ama kalmaa saa da.
“Nekadar yaşȇrsın — okadar da üürenersin. Uşaklar gösterdilär kendilerini ii taraftan. Da taradılar diil sade duruşta, ama biz taradık buumak çalımnan, acıtmak çalımnan da. Hepsinä harcadık üç afta. Belli olduk parterda. Düşünerim, ani bir-iki yılın içindä duyacez kendimizi taa ii. Onun için gideriz ileri dooru”, — nışannadı Ȇduard Kösä LİON klubun trenerı.
Yarışmaklarda pay aldı 12 sportçu, edisi onnardan kalktılar şannı pyedestalın en üüsek basamaana. En universal düüşçü çempionatta oldu Egor Vlah, söledi trener.
“Bän düşünerim, ani sport kaavileder harakterı, disţiplinayı, da ozaman olȇr üüsek çıkışlar. Bu sadece hergünkü sınışlar. Bän düşünerim, açan çocuklar başaraceklar sportu, olaceklar becerikli hem esaplı insan”, — söledi Ȇduard Kösä.
El düüştä lääzım dooru maasus güreşmäk çalımnarınnan kuvedini kullanmaa. Ȇduard Kösä üüreder uşakları kullanmaa kuvedini ölä, ki kendi hem başka insannarın saalıına zarar getirmemää.
Источник grt.md 02.06.2022