Gagauziya ku vetlerin temsil edenneri imek malların etecää için: “46-cı yılına etişmeyecez”
Bitki vakıtlar bütün dünnedä imäk malların paalılanması belli ediler. Ekspetlär hem kuvetlerin temsilcileri soruşu açȇrlar, etişecek mi devletin yaşayannarına imäk malları. Bu temayı açıkladılar GRT kanalında “Обсуждаем вместе» programanın musaafirleri.
Moldova hem dolaylar imäk mallarsız kalmayacek. Bölä fikiri açıkladı Gagauzia Halk Tolpluşunda çiftçilik soruşlarında herzamankı komisiyasının başı Valeriy Manastırlı. Deputat sayȇr, ani Moldovanın kuvetleri lääzım gözletsinär durumu, ki insana imäk malları etsin, hem savaşsınar paaları da ucuzlatmaa. O nışannadı, Ukraina devletindä cengk sebebindän Moldovaya taa aaz başladı imelik hem beslemäk malları gelmää. Ama hep okadar deputat nışannȇȇr, ani aaçlık devlettä beklenilmeer.
«Aaçlık olmayacek. Kimsey hiç beklemäzdi, ani bukadar paalar üseleceklär. Hepsi bu baalı energetika resurslarınnan, petrol mallarınnan, beslemäk mallarınnan. Bundan kaarä komuşu devlettä, Ukrainada, cenk gider, onuştan sınırlar kapalı da çoyu beslemäk malları, angılarını getirärdilär, şindi burayi etişämer. Bununnan baalı imäk malların paaların üselmesi dä. Bu baalantıyı zoor engellemää», — söledi deputat.
Şamataya hem panikaya sebep, ani insan devlettä imeksiz kalacek, yok, nışannadı Çiftçilik bakannıın başının yardımcısı Lüdmila Fileva. Moldovada 2021 yıldan da bereket var. O haberledi ani bu yıl da ii bereket bekleniler, bakmayarak ona, ani o taa iisik bıldırkıdan olacek.
«O biraz taa iisik olacek nekadar bıldır, açan biz 340 bin ton ekin topladıydık. Bu yıl hep ölä bereket beklenilmeer, neçin zerä güzün yaamur yamadıydı da o üzerä aaçlık için isidildi. Güzün çiftçilär kuru erä ekinneri ekärdilär, kışın da kaar may yoktu, onuştan 2022 yılın büük ayın 1-nädän büümnär hiç çıkmadıydı. Hepsini korku kapladı. Ama vardı umut ona hep okadar bereket olacek zerä toprak içindä dayandı da bozulmadı. Bu takım büümnär çıktılar», — söledi Lüdmila Fileva.
Programanın musaafirleri sayȇrlar, ki kahıra yok sebep, devlet etişmeyecek o hala ani imäk mallarsız kalmaa.
«1946 yılına etişmeyecez, o zaman imäk malları yoktu, bereket yoktu. Şindi berekedimiz var. Er kuvetlär durgudamȇȇrlar energiya hem petrol malların paasının diişilmesini, ozaman çiftçilik kurumnarına yardım etsinär o üzerä, ani Moldova agrar devleti da en çok vergi bu bölümdän büdjeda geler», — nışannadı Valeriy Manastırlı.
Devletin yaşayannarı kuvetlerdän raatlık hem umut beklerlär hem, ani imäk malların etişmemezlii beklenilmeer.
Источник grt.md
