Gagauziya iş adamnarınnan bakıldı kolaylıklar, nicä ilerletmää küçük hem orta biznesi Moldovada
Komratta «Nicä ilerletmää küçük hem orta biznesi» konferenţıyası geçti. Pay alannar lafettilär biznes ilermesinin perspektivaları için. Açıkladılar problemaları, angıları engel ederlär küçük hem orta biznesi götürmää. Belli ettilär, koly mı ya da zor Moldovada kendi biznesını açmaa çiftçi, yapıcılık, trasport, IT, alış veriş sektorlarında. Hep ölä açıklandı investiţıya, para hem grant kabledilmesi temaları.
İş adamnar biznes ilermesi için kolaylıkları üürendilär, nicä hükümetin tarafından yardımı kabletmää, tanıştılar başarılı iş adamnarınnan. ODİMM annatı iş adamnara üüretim kursları için, türlü sergilerdä pay almaları için. Hep ölä açıklandı Gagauziyadan proktlerin içindelii hem onnarın kolaylıkları grant kabledilmesindä.
«Gagauziyada bölä buluşmaklar her yıl isteeriz geçirmää, ki yardım etmää kurmaa baalantıları finans kaynakları temsilcilerin hem iş adamnarın aralarında», — açıkladı PRİAevents kurumun temsilcisi Raluka Voyvozänu.
Gagauziyada var 6826 iş adamı. Onnarın 91% — di küçük hem orta biznes uurunda kurumnar.
«Küçük hem orta biznes şindiki zaman yardımsız ilerleyämecek. Bu oluş yardım edecek paraylan hem informaţıyalan», — nışannadı Gagauziya investiţiya agentstvosunun başı Natalya Kojokar.
Küçük hem orta biznes bölgenin ekonomikasının temeli var nicä olsun. Bu uurda çalışan iş adamnarı Moldovanın gelirlerini islä zeedelederlär, nışannadı Gagauziyanın ekonomika ilerlemesi hem turizm bakannıın başı Natalya Çuvalskaya.
«Devlettän yardım kableder te onnar, kim küçük hem orta biznesi Gagauziyada sarsıntısız götürer hem ii çıkışları gösterer», — söledi Natalya Çuvalskaya.
Gagauziyanın büük potenţıalı var, iş adamnar ii başarları göstererlär. Onnar iş erlerini açȇrlar, eni proektleri çalıştırȇrlar, cümnenin yaşamasında pay alȇrlar, soţial proektlerä katılȇrlar, çizgiledi «NEXT iş adamnarın assoţiaţıyasının» başı Vladimir Kara.
«Sayȇrım ki, bu ii bir meydan, neredä bizim iş adamnar eni kişilärlän tanışacȇklar, kendi becermeklerini göstereceklär hem olacȇk kolaylıkları şoruşlarını açıklasınnar», — söledi Vladimir Kara.
Milli statistika saymaklarına görä, 2019-cu yılda Moldovada küçük hem orta biznesinnän zanaatlanan kişilerin sayısı 56 binä yakın etişti, angısı 98,6% bütün sayıdan kurȇr. Hep o vakıt küçük hem orta biznesin uzmannarın sayısı kurdu 335 bin, angısı 61,6% kurdu. Küçük hem orta biznesin kazancı 157 million 335 bin ley oldu, angısı 39,5% kurdu.
«Gagauziyada taa da zeedä bölä kurum var.Onnar ekonomikanın temelindä durȇrlar. Küçük hem orta biznes bölgenin ekonomikasını ilerleder hem iş erlerini açȇr», — söledi bankların birinin başı Vitaliy Ţvätkov.
«Nicä ilerletmää küçük hem orta biznesi» konferenţıyasının pay alannarı nışannadılar, ani bölä oluşlarda onnar başka iş adamnarınnan tanışȇrlar.
«Kendi problemalarımızı lääzım belli edelim. Bir tarafta kalarsaydık ölä dä yaşayacez. Lääzım kendilerimizi gösterelim, söleyelim, ani varız», — nışannadı Lüdmila Anastasova.
«Region için önemli bölä oluşların geçirilmesi. Genç iş adamnar problemalarlan karşı gelerlär. Para etişmeer, garantiyalar yok. Herbir işi büüderiz, ama ne onnarlan yapmaa sora, bilmeriz», — söledi iş adamı Ülian Gerţa.
Konferenţıyada pay aldılar: biznes-asoţıaţıyaların temsilcileri, Moldova Devletin küçük hem orta biznesin azaları, mal yapan uzmannar, küçük hem orta biznesin temsilcileri çiftçilik bölümündän, yapıcılık hem transport bölümnerindän, importlan hem eksportlan zanaatlanan iş adamnarı, IT uzmannarı, alış -verişçilär, daavacılar, investorlar, finans kurumnarı, dolay kuvetlerin temsilcileri.
Источник grt.md 27.05.2022