Gagauziya insannarından Türk halkına 2 milion ley para yardımı
Küçük ayın (fevral) 6-da Türkiyedä biri-biri ardına olan er tepremesindän zarar görän Türk halkına Gagauziyada yardım için toplanan 2 milion ley para yardımını, Baba Marta ayın 24-dä Türkiye Kişinev Büükelçisi Uygar Mustafa SERTELä verildi.
Türk halkına para yardımı alma sırasında pay aldılar Gagauziya Başkankası İrina VLAH, Türkiye Gagauziya Komrat Başkonsulu Hasan AKDOĞAN, TİKA Kişinev programaların Koordinatoru Selda ÖZDENOĞLU.
Yardımını alarkana, Türkiye Kişinev Büükelçisi Uygar Mustafa SERTEL şükür etti gagauz soydaşlarına hem bütün Gagauziya insannarına candan gelän bu yardım için. Ayırıca Canabisi şükür etti Moldova içişleri ministerliin Üstolan Dorumnar upravleniyasının kurtarıcı komandasınnan Türkiyeyä gidän hem orada en üüsek uurda işini yapan Gagauziya kurtarıcılarına Veleriy DİMÇOGLUya, Pötr KILÇIKa hem Vitaliy RUŞİKAya.
Kendi tarafından Gagauziya Başkankası İrina VLAH açıkladı, ani bu üç adama Türkiyedä kurtarıcı çalışmaları için “Gagauz Yeri” ordenı verildi.
Eridir urgulamaa, ani Baba Marta ayın 15-dä Moldova pravitelstvosu aldı karar, gumanitar yardımı olarak, Türkiyeyä 8 milion ley yollamaa.
Источник anasozu.com 27.03.2023