Gagauziya futbol koboo-2022
Harman ayın 25 dä Komrattakı stadionunda geti Gagaiyz kuboo futbolda-2022. Onda pay aldı dört kız komandası. Bakmadaan sıcak havaya, meydanda matçlar kızgındı, konkurenţıya da kaaviydi. Kuboon taraycıları oldular meydanın çorbacıları- Komrat FK. Taa derindän süjȇtımızda.
Beş saadın işindä 4 komanda kaavi yonnarda, taymdan tayma tarayıp kendi konkurentlarını, gidärdilär finala. Pay alannarın bir payına oyun pek ii geçmedi, nicä onnar kararlardı, belli ettilär türlü faktorlar. Futbolcuların laflarına görä , oyun geçti ii hem meraklı, hem da zorca, zerä çüyu oyuncular diil ilk keret pay alȇrlar bölä yarışmaklarda.
-«Yarışmaklar geçerlär ii, iki matç geçirdik birini tarattık, öbürünü taradık. Lääzım bilmää taratmaa da».
— «Pek beendim oyunu, oynadık kendimizä deyni. Bän gördüm ne bana etmer oyunda, çalışacam da gelän yıla taa ii oynayacam».
— «Oyun geçti zorca zerä biz hazırlanmadık, ama yapaceydık taaii».
Nicä sölerlär koymadınnan kuvedini, hem sevmediinän işi angısınnan zanaatlanȇrsın yoknicä üüsek uurlara etişmää. Onun için meydanda komandalar gösterdilär hepsini ne üürendilär sınışlarda hem oynadılar azartlan. Sportçular sayȇrlar , ani onnarın futbolu ayırılȇr çocuklrdan, zerä onnar taa kaavı, ama tehnika uurunda birtürlü.
— «Taradık bir komandayı, ama gücenikliyiz ani kazanmadık ilk eri. İkinci er da diil prost».
-» Pek meraklıydı, ama duyulardı kızlarda üüsek uur, kaavi oynadılar».
-«Zordu hem kolaydı. Narta komandasınnan taa zordu, turuncularlan kolaydı».
Trenerlar urguladılar, ani sıcak hava olmadı uşaklara deyni köstek, da onnar kaldılar mutlu oyundan, hem ani peydalandı kolaylık diişmää becermeklärlän hem dostlaşmaa.
NATALYA KLİPKA №31 gimnaziyanın komandasının trenerı :- «Bizim komanda toplu taa küçük yaşta uşaklarlan 2007, 2008, 2009, konkurentlar 2005-2007. Da kızlara meraklıydı oynamaa taa bük konkurentlarlan. Da onnar oynadılar ajıatajlan, zerä istärdilär onnarı taramaa. Da onnar bunu yaptılar. Nicä ilk, ölä da ikincidä bir yanışlık getirdi taratmaya».
ANDREY LEONOV Komrat FK trenerı : — » Herkeret bölä turnirlarda, herkeret açan bizdä geçer futbol kızlarda, vardı çok duygu, oldu meraklı matçlar. Hepsi onnar geçtilär üüsek uurda. Kızlar savaştılar , herbiri istärdi göstermää kendini ii taraftan. Herbir komanda istärdi tarama baaşışı. Onun için turnir ii geçti».
PÖTR KURU Gençlik hem sport bakannıın baş uzmanı : — «Te o kamandalar , ani taa ileri başladılar zanaatlanmaa futbollan, kalmȇȇrlar aşaa, dama komandalarından. Da tehnikayı angısını göstererlär bizim kızlar, kalmȇr aşaa çocuklardan. Sizdä hepsi ilerdä, sizdä hepsi var nicä olsun. Sade bilersiniz ne lääzm yapmaa. İşlemää, ki siz biläsiniz».
Yarışmakların bitkisindä erlär pay oldular butakım Koboo, para premiyasını hem diplomu kabletti Komrat komandası, angısı kazandı ilk eri. İkinci oldular Narta futbol klubu. Üçüncü erdä Aneniy Noy küüyündän futbolcular. Dördüncüdä Draslıçanı klubundan kızlar. Hepsinä verildi para premiyaları, hem diplomţ Hep ölä baaşladılar topları.
Источник grt.md 26.08.2022