Gagauzianın başkanı Başküüyüdä çiftçi çorbacıların birini dolaştı
Gauziyanın Başkanı İrina Vlah bulundu Başküüyüdä (Kirsovo) çiftçi çorbacılıında. O tanıştı ne halda büün bulunȇrlar büümnär. Çiftçi çorbacılıında işlediler 1050 ektar toprak. Bu yıl güzlüklär hem ilkyaz ekinneri bulunȇrlar ii halda.
Bakmadaan ona, ani etişmeer nemnik kırlarda, ilk grupannın bereketi hem papşoyların, semiçkanın halı ii uurda. Bitki ayların içindä yaadı pek az yaamur. Okadarki agrariyalar savaşȇrlar kulanmaa eni tehnologiyaları hem kullanȇrlar gibrid çeşitlerini, angıları yakışȇrlar bizim kuraklık klimatına.
Çiftçi kurumun başının Konstantin Fuçedjının meraları, neredä ekili ekin, boday hem nohut, bulunȇrlar ii halda da sevindirerlär gözü.
Nicä söleerlär “bir gün kırda bütün yılı doyurȇr”. Onun için Fuçedjı aylesi bir da gün geçirmeer çıkmadaan kıra. Yortular da köstek olmȇȇrlar, söleer karısı Anna. Da o hiç gücenmeer, ani ayırdı bu zanaatı. Çıkıp kıra dinnener, kaldırȇr keyfini kendi işindän.
Gagauziyanın başkanı İrina Vlah nışannadı, ani kulturaların halı ii. Da yardım devlettän bu zor vakıtlarda pek lääzım, çünkü kuraklık belli etti kendisini kış işlerindä, çoyu raps meralarını iki keret enidän ektilär. Da agarariyalar aarȇrlar eni tehnologiyaları ki toplamaa suyu, da sulamaa toprakları. Petrol malların paası hem beslemäk materialların paası urȇr onnarın cöbünä. Erlem ileri kırları sürärdilär hayvannarlan pluglan, büün tehnikaya lääzım petrol malları, angıların paası zeedelendi bir-iki keredä. Agrariyalara sıra geler aramaa kolaylık ki çıkmaa bu durumdan, ki vakıtçasına toplamaa bereketi.
Kurumun başı Konstantin Fuçedjı nışannadı, ani bakmadaan zorluklara, agrariyalar savaşȇrlar kullanmaa türlü metodları, ki kabletmää üüsek bereketi.
Anna Fuçedjının laflarına görä, erlem Ay Görgiya kırda saklanȇr garga kuşu, ozaman beklä ii bereketi. Agronom urguladı, ani bu yıl diil sade garga, ama kaaz da saklandı onnarın kırlarında. Fuçedjı aylesi nicä da hepsi çiftçilär bekleerlär yaamuru hem bereketi toplamak zamanını. Kurumun tarlalarında ekili nicä güzlüklär, ölä da ilkyaz kulturaları.
Источник grt.md
