Gagauziada sıklaştı samanın yakması
Ateş, tütün hem yanık er. Bölä durumu var nasıl görmää kırlarda, neredä başardılar ekinnerin bereketini toplamaa. Avtonomiyada sıklaştılar olaylar, açan kırlarda kalmış samanı yakerlar. Yandı şansora 135 ektardan zeedä. Taa derindän Natalya Andrieş.
Geçän afta yangın sündürücülerin hem kurtarcıların brigadaları 18 keret çıktılar kuru otun hem samanın sündürmesinä. Zararlandı 170 ektar, onnardan 13-tä kalan kırlarda saman yandı. Bu iş için haberledi Gagauziyanın hatalı olaylardab akannın uzmanı Stanislav Slesarçuk.
STANİSLAV SLESARÇUK, Gagauziya Hatalı olaylar bakannın uzmanı: «Kuru otları kırlarda Komratta, Çok-Maydanda, Ȇtuliyada, Gaydarıda hem Dezgincedä yakȇrlar».
Stanislav Slesarçuk nışannadı, ani yangının sebepinnän tutuşturmak oldu. Ki ateşlär yanmasın kırlarda bereket toplamasının vakıdında lääzım yangına karşı kuralları yapmaa. Erleri, angıları yakın boday kırlarına, daalara, avtomobil hem demir yollarına, lääzım sürülü olsunnar 4 metra genişliinnän. Hep ölä kırlar lääzım pay edili olsunnar 50 ektarlık bölümnerä, annattı Slesarçuk.
STANİSLAV SLESARÇUK, Gagauziya Hatalı olaylar bakannın uzmanı: «Kırlar araları lääzım aktarılsınnar en az 8 metra. Booday erlerindä tüklar bir vakıda brakılȇrlar, onnar da 4 metralık sürülü erlerdä lääzım olsunnar. Tarlaları korumaa deyni kombaynnarı solärkaylan doldurȇrlar kırın dışyanında».
Bakmayarak ona, ani hatalı olaylarda bakannıın uzmananrı geçirerlär profilaktika hem annatmak işleri, diil hepsi liderlar yaperlar yanına karşı kuralları. Kanon bozulmakları için kodeksä diişilmekleri giriştirdilär, angılar kuru otların hem kırlarda kalma samannarın yakmasınnan baalı, annattı Gagauziyanın dolay çevri korumasında inspekţiyasının uzmanı Tatyana Dragneva.
TATYANA DRAGNEVA, Gagauziya dolay çevri koruması inspekţiyasının uzmanı: «15 statyanın 3-cü bölümü söleer, ani açık kırda türlü büümnerin yakılması cezalanȇr para ödemesinnän. Sıradan insannar 200-300 ue, yuruduk insannarına 600-dän 800 –dän ödeyeceklär. 1 ue-50 ley. Sıradan insannara deyni 10.000-15.000 leyadan,yuridik insannarına deyni 30.000 leydän yukarı ceza koyulȇr».
Tatyana Dragneva haberledi, ani onnarın inspekţiyası kabletti altı haberi kırlarda kalma samanın yakması için.
TATYANA DRAGNEVA, Gagauziya dolay çevri koruması inspekţiyasının uzmanı: «Bir yanar erä çıktık, neredä boodaydan sora kuru samannar yanardılar. Yanȇr fidannar da, toprak ta, yokediler gumus. Yangından sora topraa kendisinä getirmää deyni pek çok gübürlemää lääzım».
Zarar topraa olȇr, ama diil sade ona, soluk ta türlü kötü zararları kableder samanın yakamasından sora, ekeldi Tatyana Dragneva.
Kalma samanın yakması kırlarda var nasıl kötü çıkışlara getirsin da bunun için çiftçi çorbacılıkların başları bilerlär, ama hep okadar çoyu onnardan ayırȇrlar en ucuz kolaylıı düşünmeyip çıkışlar için.
Источник grt.md
