Gagauz türkücüleri Mihail hem Valentina Yasıbaş «Gagauziyanın şannı yaşayanı» adınnan ödüllendilär
Çok yıllar çalışması için milli kulturanın ilerlemesi için, gagauz dilin hem incä zanaat muzika uurunda, karı – koca Mihail hem Valentina Yasıbaş «Gagauziyanın şannı yaşayanı» adınnan ödüllendilär. Onnarın türküleri Gagauziyada hem aşırı devletlerdä öterlär. Diplomnarı artistlerä baaşladı Gagauziyanın Başkanı İrina Vlah.
«Yasti» duȇtı diil saade muzika grupası. Bu karı – koca Mihail hem Valentina Yasıbaş duȇtı. Onnar evlendilär 15 yıl geeri, ondan sora nicä Mihail Çakirın adına pedagocik koledjını başardılar, Komrat Devlet Universitetinä vokal üürenmää gittilär. Çok yılların süresindä «Yasti» duȇtı eni kompoziţiyalarınnan yaşayannarı sevindirer. Gagauziyanın Başkanı İrina Vlah şükür laflarını Mihaila hem Valentinaya söledi onnarın üüsek uurunda çalışması için gagauz kulturanın ilerlemesindä.
İRİNA VLAH, Gagauziyanın Başkanı: « Sizin yaratmalarınızda bütün üürektän hem candan açıklanȇr sevgi teması ana dilinä, duuma erinä, ana – boba hatırlamasına, nicä zorlukları geçmää. Sizin türkülerin lafları pek derin, fikirli, muzika sa pek şıralı. Sanȇrım, ani bunun için da sizi severlär seslemää her bir yaşta insannar. Büünkü günnär biz geçireriz zor vakıtları, krizis vakıdını, yaradıcılık uurunda insannar yardımcı olȇrlar bizim cümneyi birleştirmää».
Muzika sayılȇr hertürlü kulturaların bir payı. O belli eder bizim yaşamamızı hem paalılıklarımızı. Muzikanın hatırınnan biz var nasıl annayalım, nicä yaşardılar hem ne düşünärdilär insannar 100 yıl geeri. Bundan karä, muzikada korunȇr diil saade annamak, kimiz biz, ama ta bizim dilimiz dä, angısında lafettillär bizim dedelerimiz, nışannadılar artistlär.
Gagauziyanın kultura bakanı Marina Semönova çizgiledi, ani «Yasti» duȇtı gözelleder avtonomiyanın hepsi konţertlarını.
Yasti» duȇtın duuması Kongaz küüyündän. O anılmış diil saade Gagauziyada, ama sınır aşırı devletlerdä da. Mihail hem Valentina Yasıbaş – onnar ilk çalgıcıların arasında, kim çeketti çıkarmaa klipları gagauz dilindä.
Источник grt.md 12.08.2022