Gagauz sportçuları greppling güreşindä respublika uurunda 6 ödül kazandılar
Çiçek ayın 9 -da geçti Moldovanın grȇppling çempionatı. Onda pay aldılar bütün devletin sportçuları. Gagauziyayı tanıttırdılar “Lion” klubun terbiedenneri. Eduard Kösenin sporçuları getirdilär regionun kumbarasına 6 ödül , angılarından biri gümüş hem beş bronz. Taa derindän süjetımızda.
„Lion” klubun terbiedilenneri sıradakı keret kararladılar pay almaa grȇppling yarışmaklarında, ki denemää kendi kuvetlerini. Sportçular gösterdilär bu sport çeşitin gözeliini. Gagauziyayı bu yarışmaklarda tanıttırdı 9 sportçu, angıları kazandılar bir gümüş hem 5 bronza ödülünü.
Çempionatın ödülcüleri oldular 50 kilalık kategoriyasında Sergey Tukan, 55 kilalık kategoriyasında Andrey Avramov hem Kristina Papadiya, 80 kilalık kategoriyada Stanislav Verbin. 18 yaşından büük bronza ödülcüleri oldular Födor Kazanjı hem Andrey Sarandi.
Uşakların laflarına görä, onnar kablettilär çok becermek, üürendilär çok enilik kendilerinä deyni, da kararladılar ileri dooru çalışmaa, koymaa eni neetleri da çıkarmaa onnarı aslıya.
Nışannayacez, ani grȇppling Moldovaya hem Gagauziyaya deyni eni sport soyu, ama onda var elementlär serbest güreşmesindän, sambodan hem dji-djiţudan. Taa çok onda var güreş tehnikaları, ama en çok yapılı akţent aarlı priyömlara. Onun için o meraklandırȇr regionun sportçularını, angıları taa üüsek uura etişerlär.
Источник grt.md
