Gagauz resimcisini Dmitriy Savastinı anmak sergisi açıldı Komratta
Komrat kasabasının istoriya hem êtnografiya muzeyindä kurulu sergi şannı resmcinin en ii işlerindän. Naturalist hem gerçektän yazan Dmitriy Savastin resimnerindä, kullanıp hertürlü tehnikaları, gösterdi haliz hem açık gagauz folklorunu. O tek sanaatçı, angısı gösterdi gagauz simalarını kahramannarında.Onun işleri anılı bütün dünnedä gagauz halkın ruhunu hem incilliini, onnarı vardı nasıl yapsın bir kıpımda bir sade kalemnän.
Geçindi şannı artist 2015-ci yılın kış vakıdında, 74 yaşında. Nedän sora, 2 yıl zamanı geçtiktän kuruldu onun yazılarından bir albom. Her yıl hederlez ayın 2-dä onun yıldönümünä adalı sergilär kurulêrlar. Bu yıl o tamannayaceydı 80 yaşını.
Komrat kasabasının istoriya hem êtnografiya muzeyindä sergiyi kurdu Dmitriy İvanoviçin oolu, resimci Sergey Savastin. Dmitriy Savastinın en tanılmış kahramanı resimnerindä karagöz gagauz kızı, tombarlak suratlı hem incä, kurgaf simalı. Onun resimneri ayırı, yazdı onnarı daalıp gagauzların ruhuna hem ecellerinä, kulturasına.
“Açan başkaları görerlär bu uuru, havezlän katılêrlar ona. Olêr onnarda da islää. Herlim sergiyä çıkararsadık 100 resim, taa sık seçerlär millet yazılarını, saygı güderlär gagauz millet resimnerinä, biz da hodullanêrız, ani sevgimiz hem havezimiz var Vatanımıza. Açan açıklêêrız kendileri katılıp, gelerlär bizä”,- söleer Sergey Savastin.
Tekrarlamaa Dmitriy Savastinin resimnerini yok nicä. O kendi onnarı birä-bir yapamazdı, eklärdi, enilärdi, katardı nesaydı, ama diiştirärdi biraz. Onun ilk grafikası belli edildi kendisinnän 60-ci yılların bitkisindä, neredä o gösterdi triptihları “Oglanın Baladası” hem linogravürayı “Bucak erlerindä”. O vardı nicä göstersin baladayı, dastanı yada masalı bir yaprakta. Herbir yazısında kimäsaydı herzaman brakardı avtografı gibi kendi taazä resimnenilmiş portretını.
“Bendä koruduldu onun 2 kiyadı hem mektubları anılmış gagauz yazıcılarına, neredä bitkidä yazallan resimnedi portretını. Ne gösterer, ani pek sevärdi resimcilii”, — söler Evgeniya Lülenova, Regional bibliotekanın baş uzmanı.
Resimcinin en ii işleri erleşili Moskvanın Tretyakov galereyasında, Kanadada, Türkiyedä hem başka devletlerdä.
Şannı resimci duudu 1942- ci yılın hederlez ayın 2-dä Valkaneş kasabasında. O başardı Kişinevdakı Repin adına uçilişesini, sora üürendi Lvov kasabasının İvan Födorov adına institutunda. 30 yıldan zeedä önce açtı Komrat kasabasında resim okulunu, neredä onun üürenicileri oldular, şindiki zamanda anılmış bütün dünnedä gagauz resimcileri. Büünnän-büün bu üüretim kurumunda var taa gençlär angıları seçerlär adımlamaa bu sanaatçının izlerinä görä.
“Pek beendim, ani kalimi kullanmış, savaşacam hep bölä”.
“Sevdim, ani bir bütün masalı bir sade yaprakta”.
“O pek gözäl kızları resimnedi, pek beendim nicê süretlerini resimnedi”.
1986-ci yılda Dmitriy Savastin kaldırdı neetini hem havezini kurmaa Gagauziyada resimcilerin birliini, da 1990-ci yıllarda barabar başka sanaatçılarlan kurdu ilk sergileri Pridnestroviyada, Azerbaycanda, Türkiyedä hem başka devletlerdä. Onun işi ayırı hem özel, onnarı tanıyȇrlar hererdä hepsi evlat boylarına.
Источник grt.md
