Gagauz güreşçisi İvan İkizli Dünnä çempionatında kazandı bronzayı
İki bronza ödülünü getirdilär Moldovanın serbest güreşçileri Dünnä çempionatın bitki günündä, agısı geçti İspaniyada. Moldovanın toplu komandasındaydı sportçu Gagauziyadan da İvan İkizli. O pay aldı 86 kilalık kategoriyada. Taa bir bronza ödülünü kazandı Vasiliy Dyakon 74 kilalık kategoriyada.
Serbest güreşçisi İvan İkizli pay aldı Moldovanın toplumunda 86 kilalık kategoriyasında da taradı 1/8 finalında Armeniyadan güreşçiyı. Buluşmak başarıldı sayıylan 11-3. Finalın dördüncü payında Gagauziyadan güreşçi buluştu Poloniyadan konkurentlan, angısını taradı sayıylan 12-7. Çıkmaa deyni finala İvan İkizli tarattı sportçuya Amerikadan 11-1 sayıylan, ama güreşärkana bronza ödülü için kongazlı sportçu taradı kaavi konkurentı Kazahstandan.
İi güreşti yarışmaklarda taa bir moldovanın sportçusu Vasiliy Dyakon, angısı getirdi taa bir bronz ödülünü.
Trenerın Roman Dermenjının laflarına görä, onun terbiedenneri yaptılar koyulmuş davaaları da ileri dooru taa sıkı hazırlanaceklar ki etişmää üüsek çıkışlara.
Aȇroportun zalasında çok insandı, angıları geldilär karşılamaa bizim sportçuları. Kutlamaklarlan onnara hem çiçiklärlän danıştı üüretim ministerliin sekretari Sergey Gurin.
“İFAVİS” fondun başın yardımcısı Valeriy Zabolotniy urguladı, ani sportçulara lääzım kurmaa ii koşulları ki onnar hazırlansınnar taa üüsek uurda.
Gagauziyanın serbest güreşmektä federaţıyasının başı Gadjı Guseynov urguladı, ani çocuklar ii güreştilär hem var kiminnän hodullanmaa.
Çeketti kendi sport yolunu İvan İkizli Kongaz küüyün sport zalasında.
Uşaklar angıları büün üürenerlär regional sport liţeyında, sölerlär ani kaavi hazırlanaceklar, ki etişmää bölä üüsek çıkışlara.
Üüsek çıkışlarda başarıldı dünnä çempionatı güreşmenin türlü disţiplinalarında. Gümüş ödül grek-rim güreşmesindä, gümüş hem bronz karılar güreşmesindä, iki bronza serbest güreşmektä hem altınnan iki bronza grepplingta. Bu pek ii çıkışlr bu yıl Moldovanın Millet güreşmäk federaţıyasında.
Reportör: Zinaida Kanţır
Video: Vlad Tabaçuk
Kurgu: Aleksey Gerçu
Источник grt.md 26.10.2022