Gagauz Erinä Ukrainadan gelän kaçannar işä girerlär
Ukrainadan kaçannar başladılar girmää işä Gagauziyada. Taa çoyu onnardan hızlı bulêr zanaatına görä iş erlerini. Birboyu sa, kimin üüsek bilgileri için dilomları var, zor erleşäbilerlär.
Ukraina vatandaşı Natalya Mokan genç ana, geldi Kongaza — duuma erinä Odessadan, cenk çeketmesinin beterinä. Ona sıra geldi brakmaa Ukrainada kocasını, evini hem işini. Gelip ana-boba evinä oolunnan, kararladı girmää işlemää terzicilik fabrikasında, Odesada hep bu uurda çalıştıydı.
“Bän hemen geldim, da burada bir aftanın içindä iş buldum. Zor işim diil, çünkü hep işledim bölä erdä. Beendim, aslıdan. İsteerim elbetki dönmää evimä, Ukrainaya, ama sıra gelecek burada duruklanmaa. Burada duudum, büüdüm. Odesada çok işledim terzi fabrikasında, bu uuru bilerim hem becererim”, — paylaştı Natalya Mokan.
Lüdmila Vasilyevna Guşul ömüründä kaçannıı sa tekrar yaşȇȇr. 80-ci yıllarda o Kazahstanda halk kalkıntılardan sora kaçtı Ukrainaya. Ozamannar studentlär Alma-Ata kasabasında kavga ettilär kuvetlärlän, annattı Lüdmila Vasilyevna. O — Sovet Briliin büük tenisinda anılmış sportçusu. Lüdmila kazandı Sovet Birliinin kuboonu, zanaatlandı bu uurlan 8 yaşından, sora 23 yaşında başladı gençleri üüretmää tenisa. Çok yıl sıravardı hazırladı tennista artık bütün dünneyä anılmış sportçuları Odesa kasabasında. Şindi artık hazır işlemää Gagauziyada.
“Burada kaçannarın merkezindä bizda var meydancık. Orada direklär da var, nereyi var nicä germää setkayı da uşakları üüretmää, ama lääzım ortaklaşmaa nesoysa”, — açıklȇȇr düşüncelerini Lüdmila Vasilyevna.
Biraz zor geldi uzmannara, kimin universitet diplomu var. Dina Elistratova — finans uurunda akademik, angısını Ukraina kuvetleri çıkardılar devlettän, çünkü Rusiyanın akademiyasında işleer.
“Çıktım Odesadan, çünkü advokatların kollegiyası izini verdi. Bizdä bu uurda taa ii koşullar, nekadar Vengriyada, Poloniyada hem Almaniyada. Şindi burada yardım vererlär her taraftan, savaşêrlar iş vermää, bän da aarêrım, çünkü üüsek kaliteli uzmanım, bän finanns uzmanı — akademik”, — annatı Dina Elistratova.
İş verennär lääzım 5 günün süresindä migrantları işä aldıynan haber versinnär migraţiya bürosuna, verip orayı iş annaşmasının bir kopiyasını, pasportunu hem özel seriyasını, angısını verer Moldovanın kuvetleri, insan girdikçä devletä.
Nışannayalım, ani bu yıl mart ayın 1-dän Moldovada kolaylattılar kaçannara iş bulmasını. Ukrainadan Moldovaya gelmiş insannar lääzım kursunnar iş annaşmaklarını iş verän kurumnarınnan, diil nicä taa ileri migraţiya bürosunun yardımınnan. Hem şindi artık diil lääzım yapmaa bir vakıda yaşamak için izinneri, ki işä girmää. Moldovada iş buldu artık 187 Ukraina vatandaşı, onnardan 139 karı, 48 da adam.
Источник grt.md
