Gagauz aktörları aldılar rol Moldovanın anılmış rejisörun Valeriy Jereginin filmindä pandemiya için
Canavar ayın 28-dä Komratta seftä gösterildi Valeriy Jereginin “Pandemia.md” artistik filmi. Premyera gösterildi Kultura evin büük ȇkranında. Film moldovan dilindä çıktı, aktörların sözü rus dilinä subtitrılarlan çevirildi. Filmdä rol aldılar gagauz teatro aktörları Marina Manjul hem Mihayil Rezuneţ.
Rejisör Valeriy Jeregi “Pandemia.md” filmindä açıklȇȇr, nicä COVID-19 cümnedä iz braktı. Rejisör söleer, ani sţenalar cümnenin moralini açıklȇȇrlar, sţenaların 90%-di rejisörun yaşamak örneklerindän alınma.
«Вenim yaşamamda okadar olay oldu ki onnarı yoktu nicä göstermemää. Pek istärdim paylaşmaa hepsinnän, ne olȇr bizimnän. Usluluk geldi, ama biz diildik hazır ecelin bu “baaşışına”. Filmdä pek çok olay gösterili, angıları yaşamktan alındılar», — açıkladı rejisör.
Valeriy Jeregi filmini şindiki vakıdımızın “freskaları” adlȇȇr. Film Moldovada yaşayan halkların kulturasını, paalılıklarını açıklȇȇr.
«Bu salonda siiredici olarak bulunarkana bana deyni önemli kendi kendinä bir taraftan bakmaa, beki kendi kendindän becermää gülmää, hem bu bir kolaylık siiredicilärlän dialog kurabilmää. Ozaman var nicä saymaa, ani dooru bir yolu ayırıp bu dünneyä kendi bakış açısınnan girdin”, — paylaştı Valeriy Jeregi.
“Pandemia.md” premyerasına yakın 100 kişi geldi. Siiredicilerin çoyu belli ederlär, ani film derin maanalı, zor süjetli, lääzım vakıt, ki hepsini annamaa. Kimileri sä söledilär, ani fılmdä kendilerini gördülär.
Filmdä rolleri 62 aktör oynadı, onnarın arasında 2 aktör Gagauziyadan — Marina Manjul hem Mihail Rezuneţ.
Маrina Manjul oynadı komendantı, angısı geçmiştä askerdi. Rol Marinaya görä yazıldı. Esaba alındı, ani aktrisa devlet dilini bilmeer. Marina kendisi teatrocu, ama o söleer, ani kinoda rol zordu.
«Bän üürendim kamera önündä oynamaa. Bana deyni alışık teatroculukta siirediciylän kontakt bir anda kurulȇr. Burada sa lääzım kameraya oynamaa. Lääzımdı üürenmää partnörunu kamera aşırı görmää. Sandım kolay olacek, ama yanılmıştım”, — paylaştı Маrina Manjul.
Prodüserlik işindä ortak oldu «Media Birlii» prodüserlik merkezi. Onun başı Vitaliy Gaydarji nışannadı, ani Gagauziya millet proektinä katılması için filmı Komratta da göstermää kolaylık oldu, da bu iş büük rolü oynȇȇr kinematografiyaya deyni da, gagauz kulturasına deyni dä.
«Biz bir devlettä yaşȇrız, da bu film gösterer Moldovada yaşayan milletlerin hem kulturaların karışımını, angısı türlü – türlü belli ediler, kimär kerä keskin, kimär kerä sä tragikomediyalı. Film gösterer kulturaların birleşmäk elementlerini hem da ne önemli – ani dil problemayı yaratmȇȇr. Milletlik dä problema olmȇȇr”, — söledi Vitaliy Gaydarji.
Film hazırlandı iki yıl, çekimnär 24 gün sürttü. Bu proekti Millet kinematografiya merkezi finansladı. Ona 2 mln 200 bin ley harcandı.
Источник grt.md
