Dizgincedä Evropa çempionatın gümüş ödülünü kazanmış Georgiy Karayi kutladılar
İtaliya devletin Rim kasabasında Evropa serbest güreşmesi çempionatı geçti. Moldovayı 21 güreşçi tanıttı, onnarın arasında iki sportçu Gagauziyadan. Komrat muniţıpiyasının sport liţeyin üürenicisi Georgiy Kara gümüş ödülü kabletti.
Sport yarışmaları kavi temel koyȇrlar gençlerin terbietmesindä. Yapȇr onnarı taa amaçlı, yardım eder bütün ürektän korkularınnan güreşmää hem üüsek başarlara getirer. Georgiy Kara seftä Evropa serbest güreşmesi Çempionatında pay aldı. Ama onun sport yolu çeketti taa ileri. Kendi becermeklerini o kazandı türlü regional hem devlet yarışmalarında.
«Eni daavaları önümä koydum. Örnek gençlerä oldum. Ötää dooru da sportlan zanaatlanacam. İsteerim pay almaa başka da yarışmalarda. Öbür Çempionattan altın ödüllän gelecäm», — annattı sportçü.
Dezgincä küüyün primarı Vasiliy Kapsamun kutladı sportçuyu onun ilk ensemäklän Evropa Çempionatında. Vasiliy Kapsamun adadı,ani sport küüdä ilerlesin deyni çok işlär yapılȇr. 2022-ci yılda küüdä sport zalası açıldı umutlan ,ani taa zeedä uşak saalıklı yaşamayı istesinnär götürmää. Serbest güreşmedä gümüş tarayanı Georgiy Kara küüyün primariyasından şükürlük kiyadını hem 20 bin ley kabletti, çünkü üüsek uurda tanıttı Gagauziyayı.
«Genç çoçuk.Gagauz. Gösterdi kendi harakterini, çetinniini. Yaşamakta yavaş çoçuk. Çoktan biri-birimizi bileriz futbol da vardır oynadıık. Ama yarışmakta nicä kendisini gösterdi. Kaavi, akıllı. Onun var daavası hem istemesi onu aslıya çıkarmaa», — söledi primar.
Gagauziya Başkanı İrina Vlah Georgiy Karayı hem onun trenerını İlyä Esiri kutladı eterli pay alması için halklar arası turnirda. O diledi ileriyä dooruda bu uurda yada taa üüsek kendilerini göstersinnär.İrina Vlah sportçuya baaşladı para premiyasını Bakannık komitetin adından.
«Herzaman açan bizim sportçular ilk erleri kazanȇrlar,biz kendimizi Moldova Devleti için hodul duyȇrız.Biz savaşȇrız örnek onnardan almaa uşaklarımıza da nasaat ederiz. Bakmayarak ona ,ani Georgiy Kara gençecik, o etiştirdi annamaa sportun filosofiyasını. Bän bilerim,ani onun gelecää sport uurunda var», — söledi başkan.
Gagauziya Halk topluşu başının yardımcısı Nikolay Ormancı katıldı kutlamaklara. Deputat nışannadı,ani hazırlanȇr kanon proekti Gagauziyanın sportçularına deyni,angıları bildirerlär avtonomiyayı türlü yarışmalarda. Kanona görä yardımı avtonomiyadan kabledeceklär sportçular ,angıları Evropa hem Dünnä Çempionatlarında hem da Olimpiya oyunnarında ilk erleri aldılar.
«Biz büün kutlȇȇrız Kara Georgiyi. Hoduluz onun için, ani o gümüş ödülü kazandı. O taa genç, lääzım taa işlesin. Ama o koydu neetinä en üüsek basamaya pinmää. Allah versin dä Georgiyi görelim Dünnä Çempionatında hem Olimpiya oyunnarında», — söledi Nikolay Ormancı.
Evropa serbest güreşmesi Çempionatında Gagauziyadan iki sportçu pay aldı. Georgiy Kara kazandı gümüş ödülü, ama Dmitriy Karastoyanov Beşgöz küüyündän 5-ci eri aldı. Şindi Evropa tarayanı Georgiy Kara Dünnä Çempionatına hazırlanȇr.
preview fotosu: İrina Vlahın facebook sayfasından
Источник grt.md 15.07.2022