Dionis Tanasoglunun yaptıkları unudulmadı
Orak ayın 7-dä Komrat Devlet universitetindä «Dialog millet dili için hem onun rolü kultura, üüretim hem incäzanaat ilerlemesindä» temayalan bilim – praktika konferenţıyası geçti. Oluş baalıydı Dionis Tanasoglunun duumasından 100 yıldönümünä.
Sabaalen Gagauziyanın bilim adamnarı, üüredicilär, Dionis Tanasoglunun dostları, ortakları Komrat Devlet universitetin şannı alleyasında toplandılar, ki anmaa gagauz yazıcısını hem onun büstuna çiçekleri koydular.
«Büün önemli gün. Dionis Tanasoglu nekadar yaşadı hepbir sölärdi, ani biz diil lääzım gagauz dilini unudalım. Koruyunuz Gagauziyayı, ilerledin gagauz dilini «, — söledi KDU rektoru Sergey Zahariya.
Esaba alarak Dionis Tanasoglunun yaptıklarını gagauz dilin korumasında hem ilerlemesindä hem onun 100-cü yıldönümünü, M.Maruneviç adına bilim -aaraştırmak merkezi » Dialog millet dili için hem onun rolü kultura,üüretim hem incäzanaat ilerlemesindä» temaya görä bilim — praktika konferenţıyası geçirdi.
«Büün gagauzların yazısı var. Gagauz dilindä tiparlanȇrlar kiyatlar hem gazetalar. Kulturamız ilerledi. Şindiki zaman bütün dünnä gagauzlar için biler hem taa üürenecek tä. Bu lafları Dionis Tanasoglu yazmış «Bucaktan seslär» kiyadın ilk sayfasında 1957-ci yılda «, — açıkladı BAM başı İrina Konstantinova.
Gagauziyanın başkanı İrina Vlah nışannadı, ani Dionis Tanasoglu örnek nicä uşak küçük küüdän var nicä zor yaşamak yolunu geçsin hem braksın bukadar derin iz halkın istoriyasında.
«Dionis Tanasoglu kendi yaşamasınnan bildirtti, ani herbiri istärsä var nicä iilik yapsın. Ama yaparkana diil lääzım beklemää ney sä geeri», — söledi başkan.
Dionis Tanasoglu pek çok kaçındı, ki ilerlesin gagauzların kulturası hem incäzanaatı, çizgiledi filologiya doktoru Vitaliy Sırf.
«Büünkü konferenţıya adalı yazıcının yıldönümünä. Bu oluş birleştirer bizi hem gösterer Tanasoglunun yaptıklarını. Onun patriotik duyguları yardım etti gagauzların kulturasını ,yazısını eni uura kaldırmaa».
«Düz-ava» oyun hem türkü ansamblisi yortulu konţerdi hazırladı. Hep ölä Dionis Tanasoglunun «Neçin, neçin» türküsü konferenţıyada öttü, onu çaldı İvan Babov.
Источник grt.md 09.07.2022